ناڤه‌ندا نووچه‌يان – سه‌ما
ئيرۆ چارشه‌مبوويێ 5ى شوباتا 2025ێ، ده‌ست ب قۆناغه‌كا دى يا هلدانا گۆڕێن ب كۆم يێن قوربانيێن ئێزدى ل ده‌ڤه‌را سولاخ ل شنگالێ هاته كرن.
تيرۆرستێن داعشێ ل ده‌مێ ده‌ست بسه‌ر شنگالێ دا گرتى، ب سه‌دان كه‌سێن بێ گونه‌هـ يێن ئێزدى دناڤ گۆڕێن ب كۆم دا گوله‌بارانكرن.
شاکر میرانی، ئەفسەرێ دەستەیا ڤەکۆلین و کۆمکرنا بەلگەنامەیان ل پارێزگەها دهۆکێ راگەهاند، ئيرۆ دەست ب هلدانا گۆڕێن ب کۆم ل ده‌ڤه‌را سولاخ ل شنگالێ هاتە کرن و هەموو روفاتێن دناڤدا بۆ نۆژداریا داد ل بەغدا دئێنە رەوانەکرن بۆ ئاشکرابوونا ناسنامەیێن قوربانیان.
میرانی ئاشكراكر:”ل شنگالێ 129 گۆرێن ب کۆم و تاکە کەسی ل دەستەیا ڤەکۆلین و کۆمکرنا بەلگەنامەیان هاتینە تۆمارکرن، هەتا نوکە 30 گۆڕێن ب کۆم ماینە و هێشتا نەهاتینە ڤەکرن”.
پرۆسه‌يا راده‌ستكرنا روفاتان بۆ كه‌سوكارێن قوربانيان ل به‌غدا ده‌مه‌كێ درێژ پێ دچت هه‌تا كو سامپلێن خوينێ يێن كه‌سوكارێن وان دئێنه وه‌رگرتن، ڤێ يه‌كێ ئێزدى دلگران كرينه و دخوازن له‌ز دڤێ پرۆسێ دا بێته كرن.