ناڤهندا نووچهیان – سهما
نڤيسكارهكێ ئێزدى ئاماژه ب وێ چهندێ دا، ئیمانا تاكێ ئێزدی ب ئێزدیاتيێ یا موكمه و بهرخودان كریه و سازش ل سهر ئۆل و ڕێورهسمێن خۆ نهكرينه.
ب ئامادهبوونا كۆمهكا ئهكادیمی، كهسايهتى و ڕهوشهنبيران، ئيڕۆ17ى تهموزا 2025، بنگههێ لالش ل دهۆكێ دانوستاندنهكا ڤهكرى ل دۆر (ئێزدیان چاوان ههتا نهۆ ههبوونا خۆ پاراستی یه)، بۆ نڤيسهر شكری رهشید خێراڤایی ڕێكخست.
نڤيسهرى ئاماژه ب وێ چهندێ دا، ئێزدی وهكو ئاینهكێ ڕهسهن و مكوم و گرێدایی ب سروشتێ دونیایێ ڤه، و ب ڕێیا سروشتی خودایهكێ تاك و بتنێ ناسكریه و دبێژت: ئهرێ ئێزدیان چاوا كاریه خۆ بپارێزن سهرهراى وان فهرمانێن بسهر دا هاتين د درێژاهيا ديرۆكێ دا.
گۆتژی: پشتی هاتنا ئاینێن ئاسمانی (مهسیح، جوهی و ئیسلام)ێ قۆناغێن دژوار كهفتینه پێشیا ئێزدیان، گهلهك جاران قۆناغ هند د دژوار بوون گههشتینه وی ڕادهيى فرمان و تالان و كۆمكوژى بسهرێ واندا بێن، پسیار ل ڤێدهرێ ئهوه ئهرێ چ نهێنى و سڕه ئێزدیان خۆ ل بهر ڤان هێرشان گرتی، بۆ نموونه ئیمراتۆریهتا ساسانیان نكارین ئێزدیان ژ ناڤ ببهن و زهردهشتیان ژی.
ئاشكراكر: ب ڕاستی ئیمانا تاكێ ئێزدی ب ئێزدیاتێ یا مكومه و بهرخودان كریه و ڕادهست نهبووينه و كۆمهكا ئهگهرێن دی، ههروهسا سهدیق دملوجی د پهرتووكا خۆ دا یا بناڤێ ( الیزیدیة) دبێژت: بتر ژ مليۆن ئێزدیان هاتنه كوشتن و سازش ژ حهد و سهد و ڕێورهسمێن خۆ نهكرن.
لدووڤدا، ئامادهبوويان ب پرسيارێن خۆ بابەت پتر دەولەمەندکرن و نڤيسهرى ههموو پرسيار بهرسڤدان.
