ناڤهندا نووچهيان – سهما
د چارچۆڤەیێ بزاڤێن بەردەوام یێن دەزگەهێ خێرخوازی يێ بارزانی بۆ پێشئێخستنا خزمەتگۆزاریيێن مرۆڤاتی و ساخلەمیيێ، ئۆفيسا شنگال یا دەزگەهی ب هەڤکاری دگەل ڕێکخراوێن( HELFEN BRINGT FREUDE و Caritas Essen) و ب هەماههنگی دگەل ڕێڤەبەریيا ساخلەمیيا پارێزگەها نەینەوا، كلينيكهكا نوو یا ساخلەمیيا ددانان ل بنگههێ ساخلەمیيا کۆمەلگەها زۆراڤا ل شنگالێ ڤەکر.
ب گۆڕهيى ڕاگههاندنا دەزگەهێ خێرخوازی يێ بارزانی بهلاڤ كرييه، ئەڤ پڕۆژەیە پێنگاڤەکا گرنگە بۆ باشترکرنا ئاستێ خزمەتگۆزاريیێن ساخلەمیيێ و دابینکرنا چارەسەریيا پێدڤی بۆ ئاکنجییێن دەڤەرێ، ب تایبەتی د بیاڤێ ساخلەمیيا ددانان دا. ل گۆڕەیى بەرنامێ کارێ كلينيكێ، ئاکنجییێن کۆمەلگەها زۆراڤا و پڕانیيا گوندێن دەوروبەرێ وێ، دێ كارن ب شێوەیەکى بەردەوام مفایى ژ خزمەتگۆزاریێن وێ یێن پزیشکی وەرگرن.
ديار ژى كر، خزمەتگۆزاری پشکنین، شيرهتكارى و چارەسەرکرنا ددانان بخۆ ڤە دگرن و ب بێ بەرانبەر دئێنە پێشکێش کرن، کو ئەڤە دێ بتە هاریکاریيەکا موکم بۆ وان وەلاتیێن کێشەیێن ددانان هەین و شیانێن دارایی نینن خزمەتگۆزاريیێن تایبەت وەرگرن.
دەزگەهێ خێرخوازی يێ بارزانی، هەردەم گرنگى ب سێکتەرێ ساخلەمیيێ دایە. ئەڤ سێکتەرە گرنگیەکا تمام ب کەرتێ ساخلەميیا جەستەیی، دەروونی و جڤاکی ددەت، ژ ڕێیا دابینکرنا خزمەتگۆزاريیێن پزیشکی وەک پشکنینا پزیشکی، نەشتەرگەری، پێدانا دەرمانان، دابینکرنا پزیشکان، ئاڤاکرنا بنگەهێن ساخلەمیيێ، پێدڤیێن ساخلەمیيێ بۆ پاراستنا خەلکی و بەلاڤکرنا هشیاریيا ساخلەمیيێ ل گۆڕەیى ڕێنمایێن ڕێکخراوا ساخلەمیيا جیهانی( WHO).