سه‌ما
پرۆژه‌يه‌كێ گوهۆرينا تۆرێن ئاڤێ ل ده‌هـ گوندێن سه‌ر ب ناحيا ئه‌لقوش ڤه دێ ئێته ئه‌نجامدان،هه‌موو زێده‌گاڤيێن ل سه‌ر تۆران هه‌ين دێ ئێنه راكرن.
رۆژا دووشه‌مبوويێ 12ى ته‌باخا 2024ێ، جندى عه‌لى،رێڤه‌به‌رێ فه‌رمانگه‌ها ئاڤا ناحيا ئه‌لقوش بۆ سه‌ما راگه‌هاند؛ پرۆژێ گوهۆرينا تۆرێن ئاڤێ ل گوندێن خه‌تارێ، خۆشابا، بۆزا، بێبان،نسێريێ،دۆغاتا و چه‌ند گوندێن دى سه‌ر ب ناحيێ ڤه دێ ده‌ست پێ كه‌ت،ئه‌ڤه نێزيكى 40 سالانه ئه‌و تۆر نه‌هاتينه گوهۆرين و كه‌ڤن بووينه و گه‌له‌ك زێده‌گاڤى ل سه‌ر هه‌نه، دێ هنده‌كێن نوو ل جهێ وان ئێنه دانان و هه‌موو زێده‌گاڤى ئێنه راكرن.
رێڤه‌به‌رێ فه‌رمانگه‌ها ئاڤێ ئاشكراكر: دگه‌ل دانانا تۆڕێن ئاڤێ دێ ميزانى ژى ئێنه دانان، بۆ هندێ ئاڤا ڤه‌خوارنێ ب بگه‌هته هه‌موو وه‌لاتيان.
ل پتريا گوندێن ناحيێ كێشه‌يا كێميا ئاڤا ڤه‌خوارنێ هاتيه چاره‌سه‌ركرن،ب ئه‌نجامدانا ڤى پرۆژه‌ى ئاڤ دێ گه‌هيته هه‌موو وه‌لاتيێن گوندێن ناڤبرى.
ناحيا ئه‌لقووش سه‌ر ب قه‌زايا تلكيفێ يه، نێزيكى 50 كيلۆمه‌تران ژ باژێرێ مووسل دووره، دكه‌فته زنجيره‌يا قونتارا چياياندا ل ناڤبه‌را پارێزگه‌هێن دهۆك و مووسلێ دا.
نێزيكى 50 هه‌زار ئێزدى ل ده‌ردۆرێن ناحيێ و ل سه‌نته‌رێ وێ ژى مه‌سيحى دژين، باژێر ب جهێن خۆ يێن شوونوارى و كه‌لتۆرى ناڤداره.