سه‌ما
بابا شێخێ ئێزديان په‌يامه‌ك ل بيره‌وه‌ريا ده‌هێ يا سالڤه‌گه‌ڕا جينۆسايدا ئێزديان به‌لاڤكر و رأگه‌هاند، ئارمانجا داعش ژناڤبرنا هەبوونا ئێزدیان و ژبیرکرنا چاند و دیرۆکا وان یا کەڤن بوو.
ده‌قێ په‌ياما بابا شێخ:
ل سێیێ ئابا 2014، دەڤەرا شنگالێ شاهدێ ئێک ژ مەزنترین تاوانێن دژی مرۆڤایەتیێ د دیرۆکا نوی دا بوو، دەمێ رێکخراوا “دەولەتا ئیسلامی ل عیراق و شامێ” (داعش) ئەڤ دەڤەرە داگیر کر و تاوانێن جینۆسایدێ ل دژی ئێزدیان ئەنجام دان، د ڤێ سالڤەگەرا خەمگین دا، ئەم هەموو رادوەستین و وان بویەرێن دلتەزين کو هه‌زاران کەسێن بێ گونەهـ ژ ژن و زارۆک و زەلامان بوونە قوربانی و هاتنە کوشتن، رەڤاندن، ئەشکەنجەدان و کۆلەکرن د سەردەمێ نوو دا، تینین بیرا خوە.
ئەڤ تاوان ئارمانجا وێ ژناڤبرنا هەبوونا ئێزدیان و ژبیرکرنا چاندا وان و دیرۆکا وان یا کەڤن بوو، لێ ئێزدیان ب خوەراگرتن و ئیرادەیا خوە یا بهێز، بۆ جیهانێ هەموویێ سەلماند کو ئەو گەلەکێ نائێنە ژناڤبرن یان شکاندنا ئیرادەیا وی.
د ڤێ سالڤەگەرێ دا، ئەم خەما خوە یا کویر و هەڤپشتیا خوە یا تەمام دگەل مالباتێن شەهیدان و قوربانیان و وندابوویان و رزگاربوویێن ڤان جينۆسايدان دیار دکه‌ین، هەروەسا ئەم دووبارە داخوازا خوە پێشکێش دکه‌ین کو پشتەڤانیا پێدڤی ژ لایێ حکومەتا فیدرال و حکومەتا هەرێما کوردستانێ و جڤاکا نێڤدەولەتی و رێکخراوێن نێڤدەولەتی و ناڤخۆیی ڤە بۆ وان بێتە پێشکێشکرن، چ ژ لایێ چاڤدێریا تەندروستی و دەروونی ڤە به یان پەیداکرنا ژیانەکا بەرێز و ئاڤاکرنا ژ نوی ڤە بە.
ئەم گازی حکومەتا عیراقێ و حکومەتا هەرێما کوردستانێ و جڤاکا نێڤدەولەتی دکه‌ین کو هەولێن خوە بەردەوام بکه‌ن بۆ بدەستڤەئینانا دادپەروەریێ، و دادگەهەکا تایبەت بۆ دادگەهکرنا تۆمەتباران پێک بینن و سوچداران بدەنە دادگەهێ دا سزایێ خوە یێ دادپەروەر وەرگرن. هەروەسا ئەم جەختێ ل سەر گرنگیا بەردەوامیا بەلگەکرنا ڤان تاوانان دکین، دا کو دووبارە نەبن ل چ جهـ و دەمان دا.
د ڤێ چارچۆڤى دا، ئەم داخوازێ ژ بەغدا و هەولێر و جڤاکا نێڤدەولەتی دکه‌ین کو ب جددی کار بکه‌ن بۆ دیتنا چارەنڤیسا ئێزدیێن وندابووی، و رێکێن کاریگەر بۆ ڤەگەراندنا وان بۆ مالباتێن وان ب سەلامەتی ببينن، دیتنا چارەنڤیسا وندابوویان و لێگەریان ل وان، گاڤەکا بنگەهین و بۆ بدەستڤەئینانا دادپەروەریێ و ڤەگەراندنا رێزێ بۆ هەر کەسێ ژ ڤان تاوانان ئێشیای.
هەروەسا ئەم سوپاسیا هەولێن حکومەتا هەرێما کوردستانێ و جڤاکا نێڤدەولەتی و رێکخراوێن جڤاکا سڤیل و هەر کەسێ بەشداری د پێشکێشکرنا پشتەڤانی و هاریکاریێ بۆ ئێزدیان د ماوێ دەه سالێن بۆری دا کری دکه‌ین، هەروەسا ئەم جەختێ ل سەر گرنگیا بهێزکرنا ڤان هەولان و بەردەوامیا کارکرنێ بۆ ڤەگەراندنا ئاوارەیان بۆ جهێن وان ب رێزداری، و ئاڤاکرنا جڤاکێن وان ژ نوو، و بهێزکرنا ئاشتی و ئارامیێ ل دەڤەرا شنگالێ دکه‌ین.
د داویێ دا، ئەم دووپات دکه‌ین کو بیرەوەریا جینۆسایدا ئێزدیان دێ هەر زیندی مینیت د دل و هزرێن مە دا، و دێ بۆ مە هەمیان بیتە هاندەر بۆ کارکرنێ ژ بۆ ئاڤاکرنا پێشەرۆژەکا باشتر، کو دادپەروەری و وەکهەڤی و ئاشتی تێدا سەروەر بن، دلۆڤانی بۆ گیانێ شەهیدان، و ڤەگەریانا وندابوویان بۆ مالباتێن وان ب سەلامەتی، و ئەم پتر کار بکین ژ بۆ بدەستڤەئینانا ئەمنیەت و ئارامیێ ل دەڤەرێن مە.
باباشێخ،شێخ عەلی شێخ ئەلیاس
3ى ته‌باخا 2024ێ