سه‌ما
ئيرۆ پێنج شەمبوويێ 15/08،2024ێ، مەسرور بارزانی، سەرۆکێ حکومەتا هەرێما کوردستانێ، پێشوازی ل ستیڤن بیتنەر، کونسۆڵێ گشتيێ نوو يێ ئەمریکا ل هەرێما کوردستانێ کر.
ل گۆڕه‌ى ڕاگه‌هاندنا حكومه‌تا هه‌رێما كوردستانێ، سەرۆکوەزیران مەسرور بارزانی، پیرۆزباهییا دەستبکاربوون ل ستیڤن بیتنەر کر و هیڤیا سەرکەفتنێ د ئەرکێ ویدا بۆ خواست.
ئاماژه ب وێ چه‌ندێ دا سەرۆكێ حكوومەتێ، هەروەسا سوپاسیا مارک سترۆ، کونسۆڵێ بەرێ یێ ئەمریکا کر، كو د کۆمبوونێدا ئامادە بوو، بۆ کارکرن د وارێ خورتکرنا پەیوەندیێن دوو لایەنە.
کونسوڵێ گشتیێ نوو یێ ئەمریکا، ژبلی نیشاندانا ئامادەییا وه‌ڵاتێ خوه بۆ گرنگیدان و بهێزترکرنا پەیوەندییان دگەل هەرێما كوردستانێ د هەموو بواراندا، بەحسا ڕۆڵێ گرنگێ هەرێما کوردستانێ کر وەک هەڤبەشەکێ بهادارێ ئەمریکا ل چەسپاندنا ئاسایش و سەقامگیرییا عێراق و دەڤەرێ.
دراگه‌هاندنێ دا هاتييه، کونسۆڵێ گشتیێ نوو یێ ئەمریکا هەروەسا ئاماژە ب سەره‌دانا فەرمییا سەرۆکێ حکوومەتێ کر بۆ ویلایەتێن ئێکگرتیێن ئەمریکا ل هەیڤا شوباتا یا ئيسالەدا، کو ڕۆلەکێ گرنگ هەبوو ل پێدانا زەلالکرنا پێتڤی دەربارەی گوهۆڕین و پێشدەچوونێن هەرێما کوردستانێ و عيراق و دەڤەرێ ب بەرپرسێن بلندێن وی وه‌ڵاتی، هیڤی خواست کو ئەڤ جۆرە سەرەدانە دبەردەوام بن.
ئامادەکاریێن ئەنجامدانا هەڵبژارتنا پەرلەمانێ کوردستانێ و چاکسازیێن وەزارەتا پێشمەرگەى و گرنگیا چارەسەرکرنا ئاریشێن هەرێما کوردستانێ و حکوومەتا فیدراڵ و دابینکرنا مافێن دەستووریێن خەلکێ کوردستانێ و جێبەجێکرنا ڕێککەفتنناما شنگالێ، پشکەکا دی یا گفتوگۆیان بوو.