مه‌سرور بارزانى سه‌رۆكێ حكومه‌تا هه‌رێما كوردستانێ په‌یامه‌ك ب هه‌لكه‌ڤتا 36 سالییا قوربانییێن ئه‌نفالا بادیناندا به‌لاڤكر و ب پێدڤى زانى، كو حكومه‌تا فیدرال ئه‌ركێ خۆ یێ ئه‌خلاقى و قانوونى بجهبینیت و ب شێوه‌یه‌كێ ژ هه‌ژى، بنه‌مال و كه‌سوكارێن شه‌هید و ئه‌نفالكرییێن ده‌ستێ ڕژێما پێشتر قه‌ره‌بوو بكه‌ت.
ده‌قێ په‌یاما مه‌سرور بارزانى:
ئه‌ڤرۆ ب ڕێزڤه بیرا خۆ ل ئه‌نفالكرییێن بادینان دئینین كو 36 سالان به‌رى نوكه، د دووماهى قووناغا ئه‌نفالا دلته‌زیندا، ڕژێما به‌عس ب هزاران مرۆڤێن بێ گونه‌هـ یێن ده‌ڤه‌را بادینان شه‌هید و بێسه‌روشوین كرن، ب سه‌دان گوندێن وێ ده‌ڤه‌رێ وێرانكرن كو بوو ئه‌گه‌رێ ئاواره‌بوونا ب ده‌هان هزاران كه‌سان.
ئارمانج ژ ڤێ تاوانا دڕندانه، بێده‌نگكرن و جینۆسایكرنا گه‌لێ كوردستانێ بوو، لێ تاوانبار و بكه‌رێن ڤێ كۆمه‌لكوژییێ، نه‌شیان ئیراده و خواستا ئازادیخوازا گه‌لێ كوردستانێ ژناڤببه‌ن.
دڤێ هه‌لكه‌ڤتێدا دووپات دكه‌ین، پێدڤییه حكومه‌تا فیدراله ئه‌ركێ خۆ یێ قانوونى و ئه‌خلاقى بجهبینیت و ب شێوه‌یه‌كێ ژ هه‌ژى بنه‌مال و كه‌سوكارێن شه‌هید و ئه‌نفالكرییێن ده‌ستێ ڕژێما پێتر یا عیراقێ قه‌ره‌بوو بكه‌ت، ل دۆر ڤێ چه‌ندێ حكومه‌تا هه‌رێما كوردستانێ دێ ل سه‌ر بزاڤێن خۆ یا به‌رده‌وامبیت، هه‌ر چییا دشیاندابیت بۆ خزمه‌تكرنا زێده‌تر یا كه‌سوكارێن شه‌هید و ئه‌نفالكرییان دێ كه‌ت و كێم خه‌مییێ ناكه‌ت.