سه‌ما
ب پشته‌ڤانى يا حكومه‌تا هه‌رێما كوردستانێ، برياره چه‌ند پرۆژه‌يێن خزمه‌تگۆزارى ل كۆمه‌لگه‌ها مه‌هه‌تێ بێنه ئه‌نجامدان، پتریا وان ژی پرۆژه‌یێن ڤه‌كرن و تێكه‌لكرن و قێركرنا جاده‌یێن ناڤخۆیی نه.
ئيرۆ ئێك شه‌مبوويێ 11ى ته‌باخا 2024ێ، ئه‌ندازيار سه‌مير به‌ده‌ل، سه‌رۆكێ باژێرڤانى يا مه‌هه‌تێ بۆ سه‌ما دياركر، ل سه‌ر بوودجه‌يا حكومه‌تا هه‌رێما كوردستانێ چه‌ندين پرۆژه‌يێن خزمه‌تگۆزارى دبياڤێ چێكرنا رێيێن ناڤخۆيى دا ل سنوورێ كۆمه‌لگه‌ها مه‌هه‌تێ هاتينه بجهئينان.
گۆت ژى: كۆمه‌لگه‌ها مه‌هه‌تێ به‌رفره‌هبوويه و برياره چه‌ند پرۆژه‌يێن دى يێن خزمه‌تگۆزارى يێن ڤه‌كرن و تێكه‌لكرن و قێركرنا جاده‌یێن ناڤخۆیی بێنه ئه‌نجامدان، هه‌روه‌سا حكومه‌تا هه‌رێمێ گه‌له‌ك گرنگيێ ب ده‌ڤه‌رێ دده‌ت.
مه‌هه‌تێ ل سالا 1975 بوويه كۆمه‌لگه‌هـ، ئێك ژ ده‌ڤه‌رێن سه‌ر ب مادا 140ڤه يه، ژ ڕوويێ ئيدارى ڤه سه‌ر ب مووسلێ يه.
كۆمه‌لگه‌ها مه‌هه‌تێ 12گوندان بخۆڤه دگرت و ئاكنجيێن وێ هه‌موو كوردێن ئێزدى نه، دكه‌فته رۆژهه‌لاتێ قه‌زا شێخان.