سه‌ما
سازييا ئێزديان يا نێڤ ده‌وله‌تى بۆ به‌ره‌نگاريا جينۆسايدێ ڕاگه‌هاند، ئەرکێ تيمێ “يونيتاد” ل عيراقێ ب داوی هاتیە و چ پێدڤی پێ نەمایە، ناخوازين بەلگە و ديکيۆمێنتێن جينۆسايدا ئێزديان راده‌ستى دەستهەلاتێن عیراقێ بكه‌ن.
حه‌سو هورمى، به‌رپرسێ سازييا ئێزديان يا نێڤ ده‌وله‌تى بۆ به‌ره‌نگاريا جينۆسايدێ(IYFPG) بۆ سه‌ما دبێژت: ئەم باوەر دکەین ئەرکێ “يونيتاد” ب داوی هاتیە، و چ پێدڤی پێ نەمایە، پشتی راپۆرتا شەشێ ل بەر ئەنجوومەنێ ئاسایيشێ ل 10/5/2021، مە دیت تیمێ دەست پێکریە کارێن خۆ به‌رفرەهـ بکەت و ل سەر تشتێن کو پەیوەندی ب قوربانیێن داعش ل شنگالێ نینن ڤەکۆلینێ دکەت، وەک ڤەکۆلینا ل سەر پارەدانا داعش یان بکارئینانا چه‌كێن کیمیايی ژلایێ داعش ڤە و بابەتێن دی، ئەڤە دەم بۆراندن بوو.
گۆت ژى: دڤێت ئەز ژ دەستپێکێ ڤە زەلال بکەم وه‌كو سازى گەلەک جاران داخواز ژ نەتەوه‌يێن ئێکگرتی کریە، دادگەهەکا نێڤدەولەتی یا تایبەت ب تاوانێن داعش بێتە دامەزراندن، هێشتا ئەم پشتگیریا نێڤدەولەتیکرنا دۆزا ئێزدیان دکەین، ژبەر نەبوونا یاسایەکا نیشتمانی یا کو سزایێ ل سەر تاوانێن نێڤدەولەتی بدەت، ژبەرکو تیمێ “يونيتاد” بەلگە و ديکیۆمێنتێن کو داعشێ تاوانبار دکەن کۆمکرینە، مە داخواز کر کو ئەڤ بەلگە ل نك لایەنەکێ بێلایەن بێنە دانان دا نەئێنە هاککرن (ئاشکراکرنا زانیاریان) و زیان نەگەهیتە شاهد و قوربانیان، چنکو هەر دزینا زانیاریان دکارت ببتە گەفەک ل سەر ژیانا وان و ئاشتیا جڤاکی ب گشتی، ئەڤە دگەل زانینا مه کو يونيتاد يا دوودلە د پارڤەکرنا بەلگەیێن کۆمکری دگەل دەستهەلاتێن عیراقی دا، ژبەرکو ئەو سزایێ سيداره‌دانێ بکاردئینن کو دژی سیاسەتا نەتەوه‌يێن ئێکگرتیە.
هه‌روه‌سا به‌رپرسێ سازييا ئێزديان ته‌كه‌زكر، د راپۆرت و گۆتنێن خۆدا ل نەتەوه‌يێن ئێکگرتی دووپاتى كريه ل سەر پێدڤیا هزرکرنێ د گاڤێن پشتی ب داوی هاتنا کارێ تيمێ ناڤبرى و پێدڤیا مفاوەرگرتنێ ژ ئەنجامێن کارێ وی بۆ سەپاندنا دادپەروەریێ و دادپەروەریێ بۆ قوربانیان ب رێکا هنارتنا دۆسیه‌ێ ژلایێ ئەنجوومەنێ ئاسایيشێ ڤە بۆ دادگەها تاوانێن نێڤدەولەتی ل لاهای یان دامەزراندنا دادگەهەکا نێڤدەولەتی یا تایبەت یان دادگەهەکا تێکەل یا تایبەت ب تاوانێن داعش ل عیراق و سووریێ یان تەنها ل عیراقێ.
هورمى دووپاتكر، ئەم ل دژی رادەستکرنا بەلگە و ديکيۆمێنتێن جينۆسايدێ نه بۆ دەستهەلاتێن عیراقێ، چنکو یاسایا عیراقێ تاوانبارکرنا ئەنجامدەرێن تاوانێن نێڤدەولەتی ناگرت، دەستهەلاتێن دادوەری ل بەغدا یان هەولێرێ هێشتا تاوانبارێن داعشێ لگۆڕ یاسایێن بەرەنگاربوونا تیرۆرێ دادگەهـ دکەن، گەلەک بەلگە هەنە کو نیشان ددەن گەندەلی و نەبوونا شەفافیەتێ و زۆرداری د سیستەما دادوەریا تاوانکاری یا عیراقێ دا هەیە، حکوومەتێ دەستێ خۆ درێژ کریە ناڤ کارێ سیستەما دادوەری، کو ئەڤێ چەندێ باوەریا وەلاتیان ب دامەزراوێن دادوەری کێم کریە و رێ ڤەکریە کو تاوانبار ب تەمامی ژ سزایى بڕەڤن و دبت کو دادگەهکرن سەرکردەیێن مەزن ژێ دەربێخت، لەوما وه‌كو سازيا مه باوەریەکا زێدە هەیە سیستەما دادوەری یا نیشتمانی نكارت دادپەروەریا ڤەگوهاستنێ پێک بینت.
برياره ل مه‌ها بێت تيمێ “يونيتاد” ب فه‌رمى ئه‌ركێ خۆ يێ ڤه‌كۆلينێ ل سه‌ر تاوانێن داعشێ ل عيراقێ ب داوى بينت.