سه‌ما
نوویكرنا دوماهیێ یا دوكانا سه‌پكان یا سه‌ره‌كى، پله‌ی، یا سیسته‌مێ ئه‌ندرۆید، شیانا دابه‌زاندنا هه‌تا 4 سه‌پكان یان یاریان د هه‌مان ده‌مدا نیشان دا. ئه‌ڤه پێشكه‌فتنه‌كه ل به‌رامبه‌ر دابه‌زاندنا سه‌پكه‌كێ ب تنێ د هه‌مان ده‌مدا و پشتبه‌ستنا ل سیسته‌مێ رێزبه‌ندیێ بۆ دابه‌زاندنا سه‌پكێن دى.
د ده‌مێ دوماهیێدا، راپۆرتان دیار كر كو كۆمپانیا گۆگل ئه‌زموونا دابه‌زاندنا فره سه‌پك و یاریان د هه‌مان ده‌مدا ل سه‌ر دوكانا پله‌ی یا مۆبایلێن ئه‌ندرۆید دكه‌ت، لێ زانیاریێن ئه‌ڤرۆ دبێژن كو هژمار دگه‌هیته 4 سه‌پكان د هه‌مان ده‌مدا.
ل دویڤ وى تشتێ GSMArena به‌لاڤ كرى، وان دیت كو هه‌تا 4 سه‌پك و یارى د هه‌مان ده‌مدا دهێنه دامه‌زراندن یان نوویكرن ده‌مێ ئه‌زموونكرنا مۆبایلا نوی iQOO Z9s Pro، دگه‌ل ڤه‌رژنا دوكانا سه‌پكێن گۆگل پله‌ی ژماره 42.4.22-31[0][PR]663941805.
راپۆرتێ گۆت كو لیسته‌كا زێده‌تر ژ 10 سه‌پك/یاریان د لیستا چاڤه‌رێكرنێدا بۆ دامه‌زراندنێ ل سه‌ر مۆبایلێ د ده‌مێ ئه‌زموونێدا هه‌بوو، و دوكانا پله‌ی هه‌تا چار سه‌پك د هه‌مان ده‌مدا دابه‌زاندن، د ده‌مه‌كیدا كو ره‌وشا یێن ماى وه‌ك “چاڤه‌رێكرن” دهاته نیشاندان.
ئه‌ڤ یه‌كه نه ته‌نها ل سه‌ر دامه‌زراندنێن نوی بوو، به‌لكو هه‌روه‌سا نوویكرنا سه‌پك و یاریێن به‌رێ دامه‌زراندى ل سه‌ر ئامیرى ژى ڤه‌گرت.
لێ، دیار دبیت كو گۆگل ئه‌ڤ تایبه‌تمه‌ندی بۆ كۆمه‌كا بچویك ژ به‌كارهێنه‌ران چالاك كریه، چونكى راپۆرتێ گۆت كو وان نه‌شیا زێده‌تر ژ سێ سه‌پك/یارى ل سه‌ر پرانیا ئامیرێن دى یێن ئه‌ندرۆید دامه‌زرینن/نوی بكه‌ن.
له‌وما، دێ بینین كا گۆگل دێ دابه‌زاندنا چار سه‌پكان ب هه‌ڤرا ده‌ستوور ده‌ت یان دێ ب سێیان بێهنڤه‌دان بیت. بۆ ئاماژه‌پێدانێ، نێزیكترین ركابه‌ر، دوكانا ئه‌پ ستۆر یا سیسته‌مێ iOS ل سه‌ر مۆبایلێن ئایفۆن، ده‌ستوورێ دده‌ت بۆ دابه‌زاندن یان دامه‌زراندنا هه‌تا 3 سه‌پكان د هه‌مان ده‌مدا.
ده‌نگه ئه‌ڤ پێشكه‌فتن جوداهیه‌كا مه‌زن بۆ به‌كارهێنه‌رێن ئه‌ندرۆید چێنه‌كه‌ت، ئه‌وێن كو نوویكرنێن ئۆتۆماتیكى یێن سه‌پكان ل دوكانا پله‌ی نه‌راوه‌ستاندین – كو ب شێوه‌یه‌كێ ستاندارد چالاكن – یان بۆ وان كه‌سێن كو تۆرێن هێدى یان ئامیرێن ب جهێ هه‌لگرتنا بچویك به‌كاردئینن.
لێ، ئه‌وێن كو سه‌پكان ب ده‌ستى نوی دكه‌ن یان ئامیرێن نوی ب شێوه‌یه‌كێ به‌رده‌وام ساز دكه‌ن، دێ ڤێ یه‌كێ سوودبه‌خش دیتن چونكى دێ هاریكاریا كێمكرنا ده‌مێ چاڤه‌رێكرنێ كه‌ت، و ب گشتى، ئه‌ڤه گاڤه‌كا باشه ژ گۆگل بۆ نوویكرنا دوكانا پله‌ی.