سه‌ما
دارا له‌يلێ، ژ ئاليێ شكستيه‌كا لالش ڤه ل په‌رستگه‌ها لالش هاتيه چاندن، كو ب ئێك ژ ب ته‌مه‌نترين دار دئێته هژمارتن و پيرۆزيا خۆ ل جه‌م ئێزديان هه‌يه.
ئێزدى ب پێخواسى قه‌ستا ناڤا په‌رستگه‌ها لالش دكه‌ن وه‌كو رێزگرتن بۆ ڤى جهێ پيرۆز و دناڤ هوندرێ لالش دا گه‌ريانێ دكه‌ن و زياره‌تى هه‌موو خاس و چاكان دبن.
لوقمان سلێمان،به‌رپرسێ راگه‌هاندنا په‌رستگه‌ها لالش بۆ سه‌ما راگه‌هاند: دارا ليلێ ژئاليێ شكه‌ستيه‌كا لالش داى فه‌خرايه‌كێ ڤه هاتيه چاندن و پاراستن و ب كه‌ڤنترين دار دئێته هژمارتن.
گۆت ژى: ته‌مه‌نێ ڤێ دارێ نێزيكى 800 سالانه و ئێزدى پيرۆزيه‌كا تايبه‌ت دده‌نێ، هه‌روه‌سا هه‌موو دارێن ل لالش پيرۆزيا خۆ هه‌يه.
پەرستگەها (لالشا) نورانى دئێته دانان ب جهه‌كێ ئۆلى يێ هەرە پيرۆز و كه‌ڤنترين په‌رستگه‌هە ل كوردستانێ و پيرۆزترين کانی لێ یە ل نك ئێزديان، دڤێت هەر کەسێ ئێزدی خۆ پێ مۆرکەت( کانیا سپی).
لالشا نورانى په‌رستگه‌ها سه‌ره‌كى يا ئێزديانه دكه‌فته باكوورێ قه‌زايا شێخان، ئێزدى رێوره‌سمێن خۆ يێن ئۆلى و جه‌ژن و هه‌لكه‌فتان لێ دگێرن و هيڤى و دوعايان بۆ مرۆڤايه‌تيێ دخوازن.