سه‌ما
هنگڤينێ شنگالێ ناڤ و ده‌نگى و تامه‌كا خۆش ل ده‌ڤه‌رێ هه‌يه ، ژبه‌ر كوالێتيه‌كا باش داخوازيه‌كا زۆر ل سه‌ر هه‌يه و بۆ ده‌رڤه‌ى وه‌لاتى ژى دئێته هنارتن و ره‌وانه‌كرن.
سالم قاسم گرمز، ئێك ژ مێشه‌ڤانێن شنگالێ يه ل گوندێ گرمز سه‌ر ب ناحيا سنوونێ ل سالا 2000 ده‌ست ب خودانكرنا مێشێن هنگڤينى كريه و بۆ سه‌ما دبێژت: پرۆژێ وى ب خودانكرن و به‌رهه‌مئينانا هنگڤينى يه ل ده‌ڤه‌رێ،هنگڤينێ شنگالێ تامه‌كا خۆش هه‌يه و پتر داخوازى ل سه‌ر هه‌يه ژبه‌ر پێكهاتێن خوارنێ يێن سه‌ره‌كى بۆ مێشێ و هنگڤينى تێدا هه‌نه.
ل ده‌ڤه‌رێ و هه‌رێما كوردستانێ و عيراقێ داخوازيه‌كا زۆر ل سه‌ر به‌رهه‌مى هه‌يه
گۆت ژى: گيرۆبوونا بارانێ ئيساله كاريگه‌رى ل سه‌ر كێميا به‌رهه‌مێ مێشان هه‌بوو، نێزيكى 2 ته‌ن و نيڤان مه به‌رهه‌م ئينا، هه‌روه‌سا زێده‌بوونا به‌رهه‌مى ژ ده‌ڤه‌ر بۆ ده‌ڤه‌رێ و سال بۆ سالێ جودايه.
وى مێشه‌ڤانى ئاشكراكر: سالانه به‌رهه‌مه‌كێ باش یێ هنگڤینی د فرۆشم، ل ده‌ڤه‌رێ و هه‌رێما كوردستانێ و عيراقێ داخوازيه‌كا زۆر ل سه‌ر به‌رهه‌مى هه‌يه، ل ده‌رڤه‌ى وه‌لاتى ژى گه‌له‌ك بۆ وه‌لاتێ ئه‌لمانيا دئێته ره‌وانه‌كرن.
مێشه‌ڤانێ ناڤبرى د درێژاهیا ئاخفتنێن خۆ دا دیار ژى كر، د سالێن بێت دا دێ پرۆژه‌يێ خۆ به‌رفره‌هتر كه‌ين بۆ به‌رهه‌مئينانا هنگڤينى.
ل ده‌ڤه‌رێن چيايێ يێن شنگالێ مێشێن هنگڤينى دئێنه ب خودانكرن، مێشه‌ڤان بزاڤان دكه‌ن به‌رهه‌مێ خۆ زێده بكه‌ن و بۆ پێويستيا ناڤخۆ دابين بكه‌ن.