سه‌ما
حکومەتا هەرێما کوردستانێ(نڤيسينگه‌ها رێكخه‌رێ راسپارده‌يێن نێڤ ده‌وله‌تى) و رێكخراوا چاڤدێریا دادپەروەریا باکوورى يا كه‌نه‌دى (NJW) ، ب هەماهەنگی دگەل زانکۆیا سەلاحەدین، رێکخراوا بیابانا کەسک و رێکخراوا رابە دێ کۆنفرانسێ نێڤ دەولەتی یێ جینۆساید و تاوانێن دژی مرۆڤایەتیێ ئه‌نجامده‌ت.
هه‌ديا حسێن، به‌رپرسا رێکخراوا رابە بۆ سه‌ما راگەهاند: سبه‌ى رۆژا دووشه‌مبوويێ 16/9/2024ێ کۆنفرانسێ نێڤ دەولەتی یێ جینۆساید و تاوانێن دژی مرۆڤایەتیێ دێ ل هه‌ولێرا پايته‌خت ب رێڤه‌چت، چه‌ندين رێكخراوێن نه حكومى يێن نێڤ ده‌وله‌تى و ناڤخۆيى، هه‌ژماره‌كا زۆر ژ كه‌سايه‌تيان بۆ گوتۆبێژكرن و داكۆكيكرنێ ل سه‌ر دادپه‌روه‌ريێ بۆ جڤاكا ئێزدى دبه‌شدارن.
گۆت ژى: کۆنفرانس بۆ ماوێ ڕۆژه‌كێ دێ به‌رده‌وام بت و رۆناهيێ ئێخستە سەر کۆمكوژیا ئێزدیان کو ژ لایێ داعشێ ڤە هاتیە ئەنجام دان.
هه‌ديا حسێن ديار ژى كر، دڤى کۆنفرانسى دا دێ دانوستاندن ل سه‌ر چه‌ند ته‌وه‌ران ئێته كرن، ئه‌وژى کەمپینا هشیارکرنێ بۆ پەروەردەکرنا جڤاکا نێڤ دەولەتی دەربارەی وان هۆڤاتێن دژی ئێزدیان دئێنە کرن بۆ پەروەردەکرنا تێگەهشتن و هەڤسۆزیەکا کوورتر بۆ قوربانیان،زێده‌بارى گەنگەشە ل سەر کەسێن بێ سەر و شوین ب ئارمانجا کۆمکرنا بزاڤان بۆ دیتن و ئێکگرتنا مالباتان، هه‌روه‌سا پشتەڤانى یا قوربانیان، لێگەریان ل دووڤ ستراتیژیێن کاریگەر بۆ پشتەڤانیکرنا قوربانیان، ژوان هاریکاریا دەروونی، چاکسازیا جڤاکی، و هاریکاریا یاسایی،کارێ نێڤ دەولەتی بۆ داکۆکیکرن ل سەر بەرسڤدانا جیهانی یا هەڤئاهەنگ بۆ چارەسەرکرنا پشتی جینۆسایدێ، ژوان دادپەروەری بۆ تاوانباران و پشتەڤانیا بەردەوام بۆ جڤاکا ئێزدی.
ئاماژه ب وێ چه‌ندێ دا دته‌وه‌ره‌كێ دى دا باس ل پەروەردەکرنا هەڤپشکی و هەڤکاریێ ب رێيا ئینانا لایەنێن پەیوەندیدار یێن جۆراوجۆر پێکڤە بۆ سەرکردایەتیکرنا گوهۆرینەکا ب واتە ئێته كرن.
به‌رپرسا رێکخراوا رابە دبێژت: ئارمانجا كۆنفرانسى هشیارکرنا جیهانێ یە دەربارەی پرسگرێک و ئاریشەیێن جڤاکا ئێزدی ب کووربوونێ د چیرۆکێن دلتەزێن یێن ژدەستدان و مانێ دا، بەحسکرنا چارەنڤیسێ وندابوویان، دابینکرنا پشتەڤانیێ بۆ قوربانیا و لێگەریان ل کاریگەریێن بەرفرەهـ یێن ل سەر مافێن مرۆڤی و دادپەروەریا نێڤ دەولەتی.
ئێك ژ ئارمانجێن كۆنفرانسى ئه‌وه جڤاكێ نێڤ ده‌وله‌تى و جيهانێ هانده‌ت بله‌ز و كريار دانپێدانێ ب كه‌يسا جينۆسايدا ئێزديان بكه‌ن.
تا نۆكه ل سه‌رانسه‌رى جيهانێ زێده‌ترى 18 وه‌لات و ده‌سته‌يان ژوانژى هه‌رێما كوردستانێ دانپێدان ب جينۆسايدا ئێزديان ل سه‌ر ده‌ستێ تيرۆرستێن داعشێ كريه.
ل 3ى ته‌باخا 2014ێ، تيرۆرستێن داعشێ هێرشه‌كا هۆڤانه كره سه‌ر باژێرێ شنگالێ و دئه‌نجامدا تاوانێن كرێت و دژى پره‌نسيپێن مرۆڤايه‌تى ل دژى خه‌لكێ شنگالێ ئه‌نجامدان.
ژ ئه‌نجامێ هێرشا داعش ب سه‌دان وه‌لاتيێن ئێزدى هاتنه كوشتن و ب هه‌زاران هاتنه گرتن و ده‌ربه‌ده‌ركرن، هێشتا چاره‌نڤيسێ زێده‌ترى سێ هه‌زار گرتيا يێ ديار نينه و جينۆسايد يا به‌رده‌وامه.