سه‌ما
پترى پێنج سالانه نێزيكى 200 رووفاتێن قوربانيێن جينۆسايدا ئێزديان، ل چه‌ند گۆڕێن بكۆم ل شنگال هاتينه هه‌لدان و بۆ به‌غدا هاتينه ره‌وانه‌كرن، هێشتا چاره‌نڤيسێ وان يێ ديار نينه.
سه‌مير فارس، ئێك ژ كه‌سوكارێن قوربانيان بۆ سه‌ما راگه‌هاند، ل سالا 2019ێ رووفاتێن 11كه‌سان ژ مالباتا مه ل گۆڕه‌كێ بكۆم ل ده‌ڤه‌را سه‌باحيه نێزيكى شنگالێ ژلايێ فه‌رمانگه‌ها كاروبارێن ب گۆڕێن بكۆم هاتنه هه‌لدان و بۆ نۆژداریا داد ل به‌غدا هاتنه ره‌وانه‌كرن، تا نۆكه ژى چ زانيارى ل سه‌ر چاره‌نڤيس و ڤه‌گه‌راندنا وان ب مه نه‌هاتينه دان.
ئاشكراكر: وه‌كو كه‌سوكارێن قوربانيان نيگه‌ران و دترسين ژ ده‌ستدانا رووفاتان پشتى بۆرينا پێنج سالان هێشتا بۆ مه ڤه‌نه‌گه‌راندينه، داخوازا گۆتنه‌كا راست و دروست ژ به‌غدایێ دكه‌ين و ئه‌گه‌رێن گیرۆبوونێ بده‌ته دیاركرن، چنكو د چاڤه‌رێ بوونه‌كا كوور داينه و هه‌رده‌م چاڤه‌رێ ڕاده‌ستكرنێ دكه‌ين داكو ب ڕێوره‌سمان ڤه‌شێرين.
ل گۆڕه‌ى زانياريان ناسنامەیێن زێده‌ترى 200 رووفاتێن قوربانیان يێن ژ ناڤ گۆڕێن ب كۆم و تاكەكەسی هاتینە دەرئێخستن ل نۆژداریا داد ل به‌غدايێ ماينه و ئاشكرا نەبووینە.
تيرۆرستێن داعش ل ده‌ما ده‌ست بسه‌ر شنگالێ دا گرتى، ب سه‌دان وه‌لاتيێن بێ گونه‌هـ يێن ئێزدى ده‌سته‌سه‌ركرن و دناڤ گۆڕێن بكۆم دا گووله‌بارانكرن.