ناڤه‌ندا نووچه‌یان – سه‌ما
هه‌ڤژينا واليێ داعش ل عيراق و سووريێ، ئوم خه‌ديجه شيشانى، د چاڤپێكه‌فتنه‌كێ دا ل گه‌ڵ كه‌ناڵێ ئه‌لعه‌ره‌بيه، زانياريێن نوو ده‌رباره‌ى ره‌ڤانديێن ئێزدى ئاشكراكرن.
ل ڕۆژا ئينيێ 23ى ئه‌يارا 2025، ئوم خه‌ديجه شيشانى، هه‌ڤژينا عه‌بدوڵلا مه‌كى ره‌فيعلا، سه‌ركرده‌يێ دوويێ ل سه‌ركردايه‌تيا داعشێ، دچاڤپێكه‌فتنه‌كێ دا ل گه‌ڵ كه‌ناڵێ ئه‌لعه‌ره‌بيه، باس ل چاره‌نڤيسێ ره‌ڤانديان و ئه‌و نه‌خۆشى و نه‌هامه‌تيێن بسه‌رێ كچ و ژنێن ئێزدى دا هاتين كر.
هه‌روه‌سا هه‌ڤژينا واليێ داعش ئاماژه ب وێ چه‌ندێ دا، گرته ڤيديۆ ل سه‌ر كوێله‌يێن ئێزدى ديتن و من خۆ ل جهێ ئه‌واندا دانا ل ناڤا رێكخستيا داعشێ، هه‌ستكر ئه‌وا بسه‌رێ ئه‌وان كچ و ژنان ئيناين ل دژى مرۆڤايه‌تيێ بوو.
ئاشكراكر:” كچ و ژنێن ئێزدى تووشى ده‌ستدرێژى و ئه‌شكه‌نجه‌دان و هه‌موو جۆرێن نه‌هامه‌تى و نه‌خۆشيان بوون ل سه‌ر ده‌ستێ داعشێ، ئەگەر ل جهێ وان ببام، ئێك ده‌مژمێرێ ژى به‌رگريا ئازاران نه‌دكر.”
ل ته‌باخا ساڵا 2014ێ، رێكخراوا داعش يا تيرۆرستى هێرشى قه‌زا شنگالێ كر و ژ ده‌ستپێكا هێرشێ ب سه‌دان وه‌لاتيێن بێ گونه‌هێن ئێزدى كوشتن و زێده‌ترى شه‌ش هه‌زار كچ و ژن و زارۆك و زه‌لام ره‌ڤاندن.
كچ و ژن قوربانيێن ئێكێ يێن هێرشا داعشێ بوون، كريارێن كرێت و هۆڤانه و ل دژى مرۆڤايه‌تيێ ل دژى وان كرن و ل ناڤ بازاران كريت و فرۆتن پێ كرن.
ب بزاڤێن به‌رده‌وامێن حكومه‌تا هه‌رێما كوردستانێ، هه‌تا نوكه زێده‌ترى سێ هه‌زار ره‌ڤاندييان ژ هه‌ر دوو ڕه‌گه‌زان هاتينه رزگاركرن و هێشتا چاره‌نڤيسێ ب هه‌زاران ره‌ڤانديان يێ ديار نينه.