ناڤەندا نووچەیان – سەما
د ڕۆژهكا وهكى ئيرۆدا ل 2-7-2024، پرۆژهيێ مينحهيا دارایی یا مهسرور بارزانی، سەرۆکێ حکومەتا هەرێما کوردستانێ بۆ ڕزگاربوويێن ئێزدی یێن ژ دەستێ داعشێ هاته ڕاگههاندن، كو زێدهترى سێ ههزار ڕزگاربوويى ژێ مفادارن و پرۆژه کۆمەکا خزمەتان وهكى (دارایی، ساخلهمى، خواندنێ) پێشکێشی ڕزگاربویان دکهت.
ل ڕۆژا سێ شهمبێ، 02-07-2024، ب ئامادەبوونی مەسرور بارزانی، سەرۆکێ حکومەتا هەرێما کوردستانێ، ڕێوڕەسمێن ڕاگەهاندنا بەرنامەیێ پشتهڤانييا دارایی بۆ ڕزگاربوويێن ژ دەستێن تیرۆریستێن داعشێ ل هۆلا سەعد عەبدوللا، ل باژێرێ هەولێرێ ب ڕێڤەچۆن.
د ڕێوڕەسمان دا، مهسرور بارزانى، سهرۆكێ حكومهتا ههرێما كوردستانێ گۆتارهك پێشكێش كر و ئاماژه ب وێ چهندێ دا، ئەڤرۆ، شانازیێ دکەین کو ڕێزێ ل قوربانیێن ڕزگاربوویێن ژ دەستێ تیرۆرستێن داعشێ دگرین، ئيرۆ ل ڤێدهرێ ب ڕێز، شکۆ و پێزانینەکا مەزن ڤە، یادا هەموو قوربانیيێن وێ کۆمکوژیيا دەستێ تیرۆرستێن داعشێ ژ خوشک و برایێن ئێزدی دکەینەڤە. هەروەسا ب پێزانینەکا زۆر ڤە، یادا خۆڕاگری، قارەمانیەتی و قوربانیدانا هێزێن پێشمەرگەیێ کوردستانێ دکەینەڤە کو ب ڕێبەرایەتیيا جەنابێ سەرۆک بارزانی تیرۆرستێن داعش تێکشکاندن و شنگال ڕزگار کرن.
سهرۆكێ حكومهتێ ڕاگههاند، د ڤێ ههلكهفتێ دا، پشتەڤانیيا خۆ بۆ داخوازیيێن ڕەوا یێن خوشک و برایێن ئێزدی دووپات دکەین، و پێدڤیيە داوى ب ڕهوشا نهئاسایی یا شنگالێ بێت و ڕێککەفتنامەیا شنگالێ وەکو خۆ بێتە بجهئینان، و ڕهوشا وێ دەڤەرێ ئاسایی ببتەڤە داکو ب هاريکاریيا حکومەتا فیدڕال و کۆمەلگەها نێڤدەولەتی، بكارين دەڤەرێ ئاڤەدان بکەینەڤە و دەستهەلاتا دەڤەرێ ژی بزڤڕتە دەستێ خەلکێ ڕەسەنێ شنگالێ.
مهسرور بارزانى، سهرۆكێ حكومهتا ههرێما كوردستانێ دياركر، حکومەتا هەرێما کوردستانێ پێنگاڤێن باش هاڤێشتینە بۆ سڤککرنا ئازارێن کەسوکارێن قوربانیيێن دەستێ تیرۆرستێن داعشێ. هەروەسا ڕۆڵەکێ گرنگ و دیار هەبوویە د ئازادکرنا ژمارەکا زۆرا ڕهڤاندییێن ئێزدی و پێکهاتەیێن دی ژ دەستێ تیرۆرستێن داعشێ، و د بزاڤێن خۆ دا ژی دێ بەردەوام بت بۆ زانینا چارەنڤيسێ هەموو وان ئەوێن تا نهۆ چارەنڤيسێ وان نهى دیار.
د پشكهكا دى يا گۆتنێن خۆ دا سهرۆكێ حكومهتێ دوپاتكر، حکومەتا هەرێما کوردستانێ کار کریيە بۆ ب جینۆسایدناساندنا تاوانێن داعشێ وەک تاوانێن شهڕى، بۆ ڤێ مەرەمێ و ب پشتەڤانيیا کۆمەلگەها نێڤدەولەتی بۆ لێپرسينێ ژ تاوانێن داعشێ، مە داخواز کر دادگەهەکا تایبەتمەند بێتە دامەزراندن بۆ دادگەهکرنا تیرۆرستێن داعشێ ل سەر تاوانێن وان یێن نێڤدەولەتی، بەلێ مخابن ئەڤ بزاڤە تا نهۆ ژی ل سەر ئاستێ فیدرالی وەک پێدڤی پێشوازی لێ نەهاتیيە کرن.
ههروهسا گۆت: دەستخۆشیيێ ل هەموو وان وهلاتان دکەین ئەوێن تاوانێن تیرۆرستێن داعشێ دژی کوردێن ئێزدی ب فەرمی وەک جینۆساید ناساندین. هیڤیدارین کۆمەلگەها نێڤدەولەتی هاريکار بت د کێمکرنا ئێش و ئازارێن خوشک و برایێن مە یێن ئێزدی دا و زڤڕاندنا ئاواران بۆ جهێن وان ب سەربلندی و ئازادی.
ئەڤ پرۆژەيێ مينحهيا دارايى ژلایێ بنگەهێ لالش ل دهۆكێ ڤە دئێتە بجهئينان و ل هەرچار دەڤەرێن خانكێ، شاریا، شێخان و دێرەبوونێ بۆ دهمێ دو سالانه ب بهردهوامى ب سهر سێ ههزار و 590 ڕزگاربوویێن ژ دەستێ داعشێ دئێته دابهش كرن، ههروهسا خودی ڕزگاربوويان ب خۆ د تیما كارى دا بەشدارن.
رۆندك دبنە هیڤی.. ئەو پرۆژەیێ ههزاران کەس دلخۆشکرین
سەرۆکێ حکومەتێ گۆت: “بەخشینەکا (مينحە) هەیڤانە دێ دەینە هەر ژنهكا ئێزدی یا ڕزگاربوویا ژ دەستێ داعش، کو ژمارەیا وان زێدەتر ژ سێ ههزار رزگاربوویێن خەلکێ شنگالێ نە.”
ئەڤ بڕیارا (مەسرور بارزانی) چەند گرنگ و مەزنە، بۆ هندێ کو ئاریشە و زەحمەتیيا ژیانا وان کچ و دایکان کێمتر بکەت، ئەو كچ و ژنێن د ڕەوشەکا دەروونی و دارایی یا گران دا دژین، ب ئەڤێ بڕیارێ پشکەک ژ کێشەیێن وان دێ ئێنە چارەسەر کرن، و دێ بتە ئەگەر کو هندەک ل سەر لنگێ خۆ ب سهكنن. ئەڤ پرۆژەیە پشکەکە ژ پلانەکا مەزن و ستراتیژی بۆ خزمەتکرنا ئێزدییان، داکو بكارن خەم و ڕۆندكێن خۆ بکەنە هیڤی و پێنگاڤێن سەرکەفتنێ.
بڕیارهكا گرنگ… بۆ بجهئينانا خەونان و ئاڤاكرنا پاشهرۆژێ
سەرۆکێ حکومەتا کوردستانێ (مەسرور بارزانی) بڕیار دا:
– رزگاربوویێن دەستێ داعش، ب ڕێکارێن زانستی، دەلیڤە بۆ بێتە ڕەخساندن داکو بكارن د ئاستێن (دبلۆم، بەکالۆریۆس، دبلۆما بلند، ماستەر و دکتۆرا) دا بخوونن.
-مەزاختیيێن خواندنا ڕزگاربوویان دێ ل سەر حکومەتا کوردستانێ بن، واتا: ڕزگاربوویى دێ بێبەرانبەر ل زانکۆ و پەیمانگەهێن حکومی و ئەهلی (تایبەت) یێن هەرێما کوردستانێ دا خوونن، د وان ئاستێن د خالا ئێکێ دا ئاماژە پێ هاتيیە دان.
رزگاربوویێن دەستێ داعش، شیانێن وان یێن دارایی سنووردارن و نەدكارين کرێیا خواندنێ بدەن، هەروەسا ژبەر دەستەسەرکرنا وان ژ لایێ تیرۆرستێن داعشێ ڤە، ژ خوندنێ دوورکەڤتبوون.
ئەڤ بڕیارا مهسرور بارزانى، دەلیڤەيهکا گرنگ و مەزن بۆ وان ڕەخساند، داکو بكارن خەونێن خۆ بکەنە ڕاستی، پاشەرۆژا خۆ مسۆگەرتر بکەن و شیانێن خۆ پێشبێخن، بەلێ ئەڤ بڕیارا ئاسانکاریيا خواندنێ دەلیڤەيهکا گەلەک مەزنە بۆ ژیانا نهۆ و پاشەرۆژا سەدان زاڕۆک، کچ و کوڕێن ئێزدی.
ئەڤ مينحهيه پشتەڤانیيەکا دارایی یا گرنگە بۆ ژیانا ڕۆژانە یا ڕزگاربوویان، ئەڤ خزمەتا بەردەوام بۆ وان ستەملێکرييێن دەستێ تیرۆرستان، ب ڕێیا تیمەکا چالاک و ب سیستم و بەرنامەکێ ڕێک و پێک بۆ (3590) ڕزگاربوویان، ژ (هەیڤا تهباخا 2024) وەرە دەستپێکریيە و دێ بەردەوام بت.
بنگههێ لالش یێ ڕەوشەنبیری و جڤاکی ل دهۆكێ، ب ڕاسپاردەيا مەسرور بارزانی، بەردەوامە د خزمەتکرنا جڤاکێ ئێزدی و ب تایبەتی ڕزگاربوویێن ئێزدی، ب بەرنامە و پرۆژەیێن جودا جودا.
بەردەوامی د خەباتێ دا نیشانا سەرکەفتنێ یە، بەردەوامی د خزمەتێ دا ژی، نیشانا دلسۆزی و وەفاداریا جەنابێ سەرۆکێ حکومەتێ یە بۆ سەرجەم کوردستانیان بێی جوداهی.
پرۆژەیێ پشتەڤانیيا دارایی… ڕابوونەڤە و پێشئێخستنا شیانان
ل تهباخا ههيڤا 8 یا سالا 2024ێ وەرە مينحەیا دارایی ب شێوەیەکێ هەیڤانە دئێتە دابەشکرن، مفادارێن ئەڤی پرۆژەیى سوپاسیيا سەرۆکێ حکومەتا هەرێما کوردستانێ دکەن بۆ ئەڤێ پشتەڤانیيا دارایی، ب تایبەتی کو ب سیستهمەکێ ڕێک و پێک ژ لایێ لژنەکا دلسۆز ڤە خزمەتا وان دئێتە کرن.
ئەڤ پرۆژەیێ مەسرور بارزانی، د قۆناغا ئێکێ دا بۆ هندێ بوو کو ڕزگاربوویى ل سەر لنگێن خۆ ب سهكنن و بارێ وان یێ دارایی باشتر لێ بێت، پاشان ڤەگەرنە سەر خواندنێ، ڕاهێنانێ و پێشئێخستنا شیانان.
كابينا نههێ يا حكومهتا ههرێما كوردستانێ ب ڕێيا پرۆژێن جودا جودا گرنگييهكا مهزن ب كوردێن ئێزدى و ب تايبهت ڕزگاربوويێن ژ دهستێ تيرۆرستێن داعشێ ددهت.
نێزيكى 12 سالان ب سەر هێرشا ڕێکخراوا تیرۆرستى يا داعش بۆ سەر قەزا شنگالێ و جینۆسایدکرنا ئێزدییان دهرباز دبن. ئەو هێرشە ئێكه ژ کارەساتبارترین هێرشێن تیرۆرستی بۆ سەر خەلكێ سڤیل کو تێدا ب سەدان هەزار کەس ئاوارەبوون و ب هەزاران کەس هاتنه کوشتن و بێ سهروشوون كرن.
