سه‌ما
ئەڤرۆ سێشەم، ٠٨-١٠-٢٠٢٤، لیژنا بلند یا پارتی دیموکراتی کوردستانێ بۆ سەرپەرشتیکرنا هەلبژارتنێن خولا شەشێ یا پەرلەمانێ کوردستانێ؛ راگەهاندنەک دەربارەی هەولدانا بەرپرسێن نووکە یێن یەکێتیا نیشتمانی یا کوردستانێ بۆ دەستکاریکرنا ئەنجامێن هەلبژارتنان بەلاڤ کر.
د راگەهاندنێ دا هاتیە: “هەروەک هوین دزانن، ئەم وەک پارتی دیموکراتی کوردستانێ پشتی بریارێن دادگەها فیدرالی یا عیراقێ ل گەلەک جهان دەربارەی رێکارێن ئەنجامدانا پرۆسەیا هەلبژارتنان نیگەرانیا خوە دەربریە، بێگومان نیگەرانیێن مە ل سەر بنگەهێ زانیاریان بوون، لێ وی دەمی بەلگە د دەستێ مە دا نەبوون، نووکە ب بەلگەڤە نیگەرانی و زانیاریێن خوە پشتراست دکەین”.
لیژنا بلند یا پارتی تۆمارا پەیوەندیەکا تەلەفۆنی یا دناڤبەرا بافل تالەبانی و قوباد تالەبانی دا وەک “بەلگە” بۆ دیارکرنا رویێ راستەقینە یێ سەرکردایەتیا نوو یا یەکێتی و ب تایبەت کورێن مام جەلال، بەلاڤ کریە و ئاماژە ب وێ یەکێ کریە: “بافل و قوباد د رێکا گەنگەشەیەکا دناڤبەرا خوە دا پیلانێن خوە یێن خراب دژی کوردستانێ، دیموکراسیێ، مالباتێن شەهیدان و پێشمەرگەیێن قارەمان باس دکەن و د هەولا ساختەکاری و دیزاینکرنەکا درەوین دا نە بۆ خوە و، ب رەزیلترین شێوە بێرێزیێ ب شەهیدێن نەمر، مالباتێن سەربلند یێن وان، پێشمەرگەیێن قارەمان و دەنگدەرێن هێژا دکەن، دا بشێن ب پیلان و ساختەکاریێ پرۆسەیەکا دیموکراسی وەک هەلبژارتنان ب رێکەکا خەلەت دا ببەن و ناشیرین بکەن”.
د خستنە روویا ڤێ بەلگێ دا، لیژنا بلند یا پارتی “بەرێ خوە ددەتە دەولەتا فیدرالی یا عیراقێ، هەڤوەلاتیێن کوردستانێ، حزب و لایەنێن سیاسی، تێکۆشەر، چاڤدێر، رایا گشتی و جڤاکا نێڤدەولەتی و ڤێ راستیێ دئێخینە بەر دەستێ وان، راستیەک کو رویێ راستەقینە یێ (بافل و قوباد) بۆ هەمیان ئاشکرا دکەت. بەلێ ئەڤەیە هەقیقەتا (بافل و قوباد)، ئەو هەردوو نوودەرکەفتیێن دونیایا سیاسەتێ، کو رۆژەکێ ژی بۆ کوردایەتیێ زەحمەت نەکێشایە و، هەر تێکۆشەرەکێ دناڤ حزبا وان دا، یان سڤکاتی پێ کرینە، یان بێزار و تەریک و پەراوێز و دەرکرینە، دا د رێکا ڤی جۆرێ پیلان و سەفقەیێن دوژمنکارانە دا دژی هەرێما کوردستانێ کار بکەن و ناڤ و دەنگێ دیموکراسیێ یێ ئەزموونا هەرێما کوردستانێ ناشیرین بکەن”.