سه‌ما
وەزارەتا دارایی و ئابووری یا حکومەتا هەرێما کوردستانێ ڕاگه‌هاندنه‌ك ل دۆر پاره‌یێ هنارتى بۆ به‌لاڤكرنا مووچەیێ هه‌يڤا نه‌هـ يێ مووچه‌خۆران به‌لاڤكر.
درۆنكرنێ دا هاتيه، پشتی سەرەدانا شاندێ تەکنیکی یێ وەزارەتا دارایی و ئابووری یا هەرێما کوردستانێ، د دوو حەفتێن بوری دا بۆ باژێرێ بەغدا و کۆمبوونا وان دگەل فەرمانگەهێن پەیوەندیدار یێن وەزارەتا دارایی یا عیراقێ، پرانیا ئاریشێن تەکنیکی یێن لیستا مووچان هاتنە چارەسەرکرن و بریار هاتە دان کو هەمی ئەو پارێن ژ لیستا مووچێن مەهێن بوری هاتینە راگرتن، بهێنە خەرجکرن.
و ب چەند خالان هویركاری ڕوونكرن؛
١- رۆژا دووشەمبێ (٢٠٢٤/١٠/٧) برێ (٣٢٩،٣٩٢،٠٠٠،٠٠٠) سێسەد و بیست و نەه ملیار و سێسەد و نۆد و دوو ملیۆن دینار وەک مافێن مووچێن مەها ئەیلوولێ یێن هێزێن ئەمنی هاتنە دانان سەر حسابێ بانکی یێ وەزارەتا دارایی و ئابووری ل قۆلا هەولێرێ یا بانکا ناڤەندی یا عیراقێ.
٢- برێ تەمویلێ مای ل بەر دەستێ وەزارەتا دارایی یا هەرێما کوردستانێ پشتی تێرکرنا کێماسیا مووچێن مەها ئابێ (٣٦١،٠٠٠،٠٠٠،٠٠٠) سێسەد و شێست و ئێک ملیار دینارە.
٣- کۆیا گشتی یا وی پارەی یێ نووکە ل بەر دەستێ وەزارەتا دارایی یا هەرێما کوردستانێ بۆ مووچێن مەها ئەیلوولێ (٦٩٠،٣٩٢،٠٠٠،٠٠٠) شەشسەد و نۆد ملیار و سێسەد و نۆد و دوو ملیۆن دینارە، ب ڤێ یەکێ نێزیکی (٣٠٥،٠٠٠،٠٠٠،٠٠٠) سێسەد و پێنج ملیار دینار کێماسی هەیە بۆ دابەشکرنا مووچێن مەها ئەیلوولێ.
٤- ل سەر بنگەهێ وان سۆز و تێگەهشتنێن ژ لایێ وەزارەتا دارایی یا حکوومەتا فیدرال ڤە ب شاندێ تەکنیکی یێ وەزارەتا دارایی و ئابووری یا هەرێما کوردستانێ هاتینە دان، د ڤان چەند رۆژان دا هەمی ئەو پارێن ژ مووچێن مەهێن بوری هاتینە برین دێ هێنە خەرجکرن، دا بشێن کێماسیا مووچێن مەها ئەیلوولێ پێ پر بکەن.
٥- ژ مەها تەممووزێ ڤە کو مووچێن خانەنشینێن هەرێمێ هاتینە هەڤتاکرن دگەل یێن عیراقێ، ئەو تەمویلێ بۆ مووچێن خانەنشینان زێدە بووی و برێ وی مەهانە نێزیکی (٤٥،٠٠٠،٠٠٠،٠٠٠) چل و پێنج ملیار دینارە و هەمی ژ داهاتێ ناڤخۆیی یێ هەرێما کوردستانێ هاتیە دابینکرن، سەرەرای پێکئینانا لیژنا هەڤبەش د ناڤبەرا هەرێم و بەغدا دا و ئەنجامدانا چەندین کۆمبوونان، لێ هێشتا ژ لایێ وەزارەتا دارایی یا عیراقێ ڤە چ تەمویل بۆ هەڤتاکرنا مووچێن خانەنشینان نەهاتیە خەرجکرن.
٦- پتر ژ مەهەکێ یە نڤیسارا ڤەگوهاستنا پارەی ژ برگەها تەرخانکری یا خەرجیێن بکارئینانێ بۆ برگەها تەرخانکری یا چاڤدێریا جڤاکی و خانەنشینی د پشکا هەرێما کوردستانێ دا ل وەزارەتا دارایی یا عیراقێ یە دا بشێن تەرخانکریێ دارایی بۆ هەڤتاکرنا مووچێن خانەنشینان دەستەبەر بکەن، لێ هێشتا ژ لایێ وەزارەتا دارایی یا عیراقێ ڤە کار ل سەر نەهاتیە کرن.
وەک وەزارەتا دارایی و ئابووری ئەم چاڤەرێ نە د نێزیکترین دەم دا گوژمێ تەمامکەر بۆ مووچێن مەها ئەیلوولێ ژ لایێ وەزارەتا دارایی یا حکوومەتا فیدرال ڤە بهێتە خەرجکرن دا راستەوخۆ دەست ب دابەشکرنا مووچێن مەها ئەیلوولێ بکەین.
راگەهاندنا وەزارەتا دارایی و ئابووری یا هەرێما کوردستانێ
٢٠٢٤/١٠/٨