ناڤەندا نووچەیان – سەما
نوونهرێ كۆتايا ئێزدييان ل پهرلهمانێ عێراقێ ئاشكراكر، سهرۆكێ جڤاتا نوونهران ههيبهت ئهلحهلبووسى پێشنيازهكا گرێدايى مافێن ئێزدى و كوردێن فهيلى و مهسيحى و سابئهيان د ليژنهيێن پهرلهمانى دا ڕهتكر، سهرهڕاى هندێ كو ههردوو جێگرێن سهرۆكێ پهرلهمانى ڕهزامهندى ل سهر دابوو.
خالد سهيدۆ، نوونهرێ كۆتايا ئێزديان ل پهرلهمانێ عێراقێ، دوهى دووشهمبوويێ 9ـى ئادارا 2026، د كۆنگرهيهكێ ڕۆژنامهڤانى دا ل ئاڤاهيێ پهرلهمانى ڕاگههاند، ئهڤ پێشنياره ل شوباتا بۆرى ژ لايێ نوونهرێن پێكهاتهيان ڤه هاتبوو پێشكێشكرن بۆ ههمواركرنا ماددهيا ههفتى و دوو ژ پهيڕهوێ ناڤخۆ يێ جڤاتا نوونهران دا كو نوونهرێ پێكهاتهيان ماف ههبت خۆ بۆ ئهندامهتييێ و سهرۆكاتييا ليژنهيان بهربژار كهت و ههلبژارتنا ليژنهيێ ب تنێ ل دووڤ حهزا نوونهرێ پێكهاتهيان بت. ههروهسا داخوازا هندێ هاتبوو كرن كو نوونهرێن پێكهاتهيان ببنه ئهندام د ليژنهيێن زێده دا وهكى( كۆچ و كۆچبهران، ئهوقاف، عهشيرهت، ليژنا شههيد و زيندانيێن سياسى).
سهيدۆ سهرسۆرمانييا خۆ ژ ههلويستێ سهرۆكێ جڤاتا نوونهران دياركر و ئاماژه ب وێ چهندێ دا “ڕهتكرنا وى نهدادپهروهرى و پهراوێزخستنهكا ئاشكرايه د دهرههقێ پێكهاتهيان دا و داخوازا چاڤخشاندنێ د بڕيارێ دا كر دا كو ههڤسهنگيا نيشتيمانى ل ژێر قۆبهيا پهرلهمانى دا بێته پاراستن.”
ئهڤ بڕياره د دهمهكێ دا هاتيه دان كو پهرلهمانى د ڕوونشتنا خۆ يا ژماره دوازدێ دا دهنگدان كر ل سهر ئهندامێن ليژنهيێن دايمى و سووندا ياسايى يا چهند پهرلهمانتارێن جێگر.