وەغەرا پێنوسەکی چەلەنگ
ل وارگەهەک شۆخ و کەڤنار
بێ فێت وترس؛
دناڤ جەرگێ نەیاراندا،
ل چاندا ئۆلەک پڕ کەڤنار
وی کرن پرس
ل ئێزدیخانێ
لکوژیێت تاری د بوو شەمال،
کاغەزێت سپی
ب رامان و پەیڤێت هەژی
وی رەشکرن،
ب بیرو باوەڕێت مەزن
تژی کرن ،
پێنگاڤ پێنگاڤ
وەک تیرۆژکێت رۆناهیێ
بۆ تەڤ چیرۆک وئەڤسانێت
بێ دەنگ وخاڤ و ڤەشارتی
دبوو مزگینی،
ب مەزناهی
خودان هزر وبیرێت نوو بوو
ل دووری و غەریبی یا
بۆ هەموو دۆست و هەڤالان
یێ نێزیک بوو؛
ژنیشکێڤە!
وەک خەونەکێ
ب ئێک جاری
ژلالش و وارێ خۆ خواست
خوندەڤان و تەڤ دۆستێت وی
تۆڕەڤان وشاگردێت وی
سار سەکنین!
ئەوان زانی
ژئیرۆ ووێڤە قەد نکارن
ب دیتن و هزرێت نڤیسکار
پیر خدری
ئێدی پشتا خۆ گەرم کەن
ئەو رۆژ نەما
ب پرس وپێشنیازێت خۆ
جڤاتا بهێز و رەوش بکەت
ئەو ستێرا گەش؛
ئیرۆ ژئەسمانێ مە ڕژیا،
دڤی دەمی دە
بزاڤ وماندیبوونا وی
چ بێژینێ؟
بێژین کەڤال
چ رەنگ تێرا هندێ ناکەن
ئارمانجا وی پێ دیاربت
بکەینە شانۆ
بکەینە پەرتوک
بکەینە ڕۆمان
چ پەیڤ تێرا هندێ ناکەن
بزاڤا وی بێتە بەرچاڤ
