سه‌ما
وەزارەتا پلاندانانا عيراقێ دیار کر، کو رێژا عیراقیێن ژێر 14 سالی دگەهیتە 40% و پتر ژ نیڤا خەلکی چینا چالاکن.
په‌يڤدارێ وەزارەتێ، عەبدولزەهرە ئەلهنداوی، بۆ ئاژانسا هەوالێن عیراقی (واع) گۆت: “عیراق سالانە زێدەبوونەکا خەلکی ب رێژا 2.6% دبینیت، ئەڤ چەندە دیار دکەت کو هەژمارا خەلکی سالانە ب ملیۆنەکێ یان پتر زێدە دبیت.”
هەروەسا گۆت: “هەژمارتنێن خەلکێ عیراقێ د داویا سالا 2023 دا ژ 43 ملیۆن کەسان دەرباز بوو، و تێ پێشبینیکرن کو ئەڤ هەژمارە دێ ژ 44 ملیۆن کەسان دەرباز بیت د داویا سالا 2024 دا.” هەروەها ئاماژە دا کو “دێ هەژمارا دروست و داوی یا خەلکی ژ رێیا سەرژمێریا خەلکی هێتە زانین یا کو دێ د 20 و 21 ڤی هەیڤێ دا هێتە ئەنجامدان.”
په‌يڤدارى رۆنکر کو “خەلکێ عیراقێ دهێنە دابەشکرن بۆ چەند چینێن ژیێ، کو زارۆکێن ژ ژیێ سفر هەتا 15 سالی پتر ژ 40% ژ هەمی خەلکی پێک دئینن، د دەمەکی دا چینا چالاک ژ ئالیێ ئابۆری (ژ ژیێ 16 هەتا 64 سالی) نێزیکی 57% پێک دئینن، و پیر و کەڤنەسال یێن ژیێ وان 65 سال و سەرتر نێزیکی 3% تنێ پێک دئینن.”
د بەردەواميا ئاختنا خۆ دا گۆت: “لسەر ڤان چینێن ژیێ، رێژێن خودانکرنا مالباتان، چ بۆ زارۆکان یان بۆ پیر و کەڤنەسالان، پتر زەلال بوویە.”
دەربارەی رێکارێن حکومەتێ بۆ کێمکرنا هەژاریێ، ئاماژە ب وێ چه‌ندێ دا کو “عیراقێ د دوو سالێن دەربازبوویی دا رێکارێن گرنگ د ڤی واری دا دیتن، بتایبەت یێن پەیوەندیدار ب تۆرا پاراستنا جڤاکی کو سەرچاوێن دراڤی بۆ مالباتێن هەژار دابین کرین، هەروەسا سەبەتا خوارنێ ژ رێیا کارتا خوارنێ هاتە دابینکرن، کو هاریکار بوو د دابینکرنا خوارنێ بۆ هەژاران ب رێکەکا بەردەوام و پاراستی.”
ئاخڤتنکاری تەئکید کر کو “ڤان رێکاران هاریکاری کر د کێمکرنا ئاستێن هەژاریێ دا ل عیراقێ، کو رێژا هەژاریێ ژ نێزیکی 23% بەری دوو سالان دابەزی بۆ نێزیکی 17% نوکە.” وی ئاماژە دا کو “ئەڤ رێکارە بەردەوامن بۆ پشتەڤانیا مالباتێن هەژار د هەمی واران دا.”