ناڤەندا نووچەیان – سەما
چالاكڤانه‌كێ ئێزدى ئاشكراكر، گه‌له‌ك گرۆپێن توندره‌و دناڤا ئۆپزسيۆنا سووريێ دا هه‌نه و مه‌ترسى نه ل سه‌ر ژيانا كێمينه‌يان و ب تايبه‌ت ئێزديان.
ل رۆژێن بۆرى ژبه‌ر شه‌ڕ و ئالۆزيێن سووريێ و ب تايبه‌ت ل باژێرێ حه‌له‌بێ، ب سه‌دان خێزانێن ئێزدى ده‌ربه‌رده‌ر و ئاواره‌بوون و گه‌له‌ك ژێ بۆ قورتالكرنا ژيانا خۆ ڤه‌گه‌ريانه عه‌فرينێ و هنده‌ك ژى چووينه ده‌ڤه‌را جزيرێ ل رۆژهه‌لاتێ فوراتێ.
ل رۆژا دووشه‌مبوويێ 9ى كانوونا ئێكێ 2024ێ، جابر جندۆ، چالاكڤانێ ئێزدى دبياڤێ مافێ مرۆڤى دا بۆ سه‌ما راگه‌هاند: ره‌وشا سووريێ يا هه‌ستيار و ب مه‌ترسى يه ب تايبه‌ت بۆ ئێزديان ل باژێرێ حه‌له‌بێ كو هێشتا چه‌ندين خێزانێن ئێزدى ل تاخێن ئه‌شره‌فيێ و شێخ مه‌قسوود ئاكنجى نه و گه‌له‌ك ژى ئاواره‌يى عه‌فرينێ و ده‌ڤه‌رێن دى بووينه، گرۆپێن توندره‌و دناڤا ئۆپزسيۆنا سووريێ هه‌نه و دترسين تاوانێن دژى مرۆڤايه‌تيێ ده‌رهه‌قێ ئێزديان ئه‌نجام بده‌ن.
چالاكڤانێ ئێزدى دبێژت:” پێدڤيه لايه‌نێن په‌يوه‌نديدار يێن ئێزديان و جڤاكێ نێڤ ده‌وله‌تى بێنه سه‌ر خه‌ت و رێگريێ ل كريارێن ئه‌وان گرۆپان بكه‌ن و نه‌هێلن چوو تاوانان ل دژى ئێزديان بكه‌ن و سڤیلان ب پارێزن و پێگیریێ ب پاراستنا مافێن مرۆڤى بكه‌ن”.
ناڤبرى ئاماژه ب وێ چه‌ندێ دا، ئاواره‌يێن ئێزدى دره‌وشه‌كا په‌ريشان دا دژين و رێكخراوێن مرۆڤى يێن جيهانى هاريكاريێ ناكه‌ن و ب تنێ هنده‌ك رێكخراوێن ناڤخۆيى نۆكه هاريكاريان ل سه‌ر ئاواره‌يان دابه‌ش دكه‌ن.
دوهى سووریا ب ته‌مامى كه‌فته ده‌ست گرۆپێن چه‌كدار و ده‌ست ب سه‌ر پایته‌ختا وه‌لاتى دا گرت و سه‌رۆكێ وى وه‌لاتى ژى ره‌ڤییه رووسیا.
هه‌ڤده‌م چه‌ندين سازيێن ئێزديان ل سووريێ دبه‌ياننامه‌يێن خۆ دا، داخواز ل ئاواره‌يێ ئێزدى ل حه‌له‌بێ كرن قه‌ستا چ ده‌ڤه‌رێن دى نه‌كه‌ن و ڤه‌گه‌رنه ده‌ڤه‌رێن خۆ يێن ره‌سه‌ن ل باژێرێ عه‌فرينێ داكو گوهۆڕينێن ديموگرافى په‌يدا نه‌بن.