ناڤەندا نووچەیان – سەما
كريستوفر بيم، باليۆزێ كه‌نه‌دا ل عيراقێ سه‌ره‌دانا په‌رستگه‌ها لالش كر و راگه‌هاند، كه‌يسا ئێزديان ئێك ژ ئارمانجێن وان يێن گرنگه و دێ به‌رده‌وام بن ل سه‌ر پشته‌ڤانى يا ئێزديان.
كريستوفر بيم، باليۆزێ كه‌نه‌دا ل عيراقێ دگه‌لدا خانم تامى ئاميز، سه‌ره‌دانا په‌رستگه‌ها لالش كرن و ژلايێ فه‌ره‌ج خێرى به‌گ، نوونه‌رێ ميرێ ئێزديان و چه‌ند كه‌سايه‌تيان ڤه هاتنه پێشوازيكرن.
باليۆزێ كه‌نه‌دا دياركر، كه‌يسا ئێزديان ئێك ژ ئارمانجێن وان يێن گرنگه و وه‌زاره‌تا ده‌رڤه‌يا وى وه‌لاتى هه‌رده‌م پشته‌ڤانى خۆ بۆ ئێزديان دوپاتكريه، نه‌خاسمه كه‌نه‌دا ژ وان وه‌لاتان بوويه ئه‌وا بسه‌رێ ئێزديان دا هاتى ل سه‌ر ده‌ستێ داعشێ وه‌كو جينۆسايد ناسانديه.
ژلايێ خۆڤه شاندێ ئێزدى چه‌ند داخوازى گه‌هاندنه باليۆزێ كه‌ندا و خواست، كو به‌رده‌وام بن ل سه‌ر پشته‌ڤانى يا كه‌يسا ئێزديان و ڕێكێ نه‌ده‌ن پێشلكارى ده‌رهه‌قێ ئێزديێن سووريێ بێنه كرن و بپارێزن.
باليۆزێ كه‌نه‌دا خۆشحاليا خۆ بڤێ سه‌ره‌دانێ ده‌ربڕى و ژ نێزيك ڤه هايدارى ب رێڤه‌چوونا رێوره‌سمێن ئۆلى ل په‌رستگه‌هێ بوو و گه‌ريانه‌ك دناڤ هوندرێ لالشێ دا كر.
