ناڤەندا نووچەیان – سەما
نڤيسينگه‌ها رزگاركرنا ره‌ڤانديێن ئێزدى نووترين زانياريان ده‌رباره‌ى ره‌ڤانديێن ئێزدى ل كه‌مپا هۆلێ ئاشكرا دكه‌ت.
ل گۆڕه‌ى نووترين ئامارا نڤيسينگه‌ها رزگاركرنا ره‌ڤانديان 3 هه‌زار و 584 ره‌ڤاندى ژ ده‌ستێ داعشێ هاتينه رزگاركرن و 2 هه‌زار و 591كه‌س ماينه.
ل رۆژا چارشه‌مبوويێ 11ى كانوونا ئێكێ 2024ێ، حسێن قائيدى، به‌رپرسێ نڤيسينگه‌ها رزگاركرنا ره‌ڤانديێن ئێزدى بۆ سه‌ما راگه‌هاند: پشتى شه‌ڕ و ئالۆزيێن ل سووريێ چێبووين، ب هويرى دووڤچوونا ره‌ڤانديێن ئێزدى دئێته كرن، ب تايبه‌ت ل كه‌مپا هۆلێ پێشبينى دكه‌ين پترى 300ره‌ڤانديان هه‌بن، جهێ داخێ يه ده‌ستهه‌لاتا كه‌مپێ يا هاريكار نينه ره‌ڤانديان رزگار بكه‌ين.
به‌رپرسێ نڤيسينگه‌ها رزگاركرنا ره‌ڤانديان دووپاتكر، ل گه‌ل گه‌له‌ك لايه‌نان بزاڤ كريه بچينه دناڤ كه‌مپا هۆلێ دا و ئه‌ڤه بابه‌ته‌ك مرۆڤى يه و دووره ژ هه‌ر بابه‌ته‌كێ ديتر و حكومه‌تا فيدرالا عيراقێ ژى بۆ بابه‌تێ رزگاركرن و لێگه‌ريانێ يا ره‌ڤانديان يا هاريكارنينه.
قائيدى دبێژت:” داخوازێ ل هه‌موو لايه‌نێن عيراقێ دكه‌ين هه‌ڤكار بن و بێنه سه‌ر خه‌ت بۆ رزگاركرنا ره‌ڤانديێن ئێزدى ل سووريێ”.
ل 3ى ته‌باخا 2014ێ، تيرۆرستێن داعشێ هێرشى قه‌زا شنگالێ كر و دئه‌نجامدا 6 هه‌زار و 417 وه‌لاتيێن ئێزدى كه‌فتنه ده‌ستێ تيرۆرستان دا و هێشتا چاره‌نڤيسێ ب هه‌زاران يێ ديار نينه.