ناڤه‌ندا نووچه‌يان – سه‌ما
په‌يڤدارا فراکسیۆنا پارتی ل پەرلەمانێ عیراقێ داخوازێ ژ دەستهەلاتا نوو یا سوورییێ كر، بابەتێ رزگارکرنا کچ و ژنێن ئێزدی ژ دەست داعشێ ب رژدی وەربگرت و کار بۆ رزگار کرنا وان بكه‌ن.
د. ڤیان دەخیل، په‌يڤدارا فراکسیۆنا پارتی ل پەرلەمانێ عیراقێ د راگەهاندنەکێ دا ئاشکرا کر: ژمارەیەکا مەزن یا کچ و ژنێن ئێزدی یێن داعشێ رەڤاندین، نوکە د ناڤ ئاخا سوورییێ دانە، لەورا پێدڤیە دەستهەلاتا نوو یا سوورییێ بابەتێ رزگارکرنا وان ب رژدی وەربگرت و داخوازا ئاشكراكرنا چارەنڤیسێ ره‌ڤانديێن ئێزدی ل سووریێ دکەین.
هه‌روه‌سا د راگەهاندنا خۆ دا ئاماژە دایە رۆلێ حکومەتا هەرێما کوردستانێ و نڤیسینگەها رزگارکرنا رەڤاندیان و دیارکرییە، وان هەردو ئالییان د سالێن بۆری دا یا پێدڤی بۆ رزگارکرنا کچ و ژنێن ئێزدی و دوبارە ڤەگەڕاندنا وان بۆ ناڤ جڤاکی کرییە، لەورا نوکە پێدڤییە دەربارەی رزگارکرنا ئێزدییان حکومەتا عیراقێ ب رەنگەکێ فەرمی و بلەز پەیوەندییێ ب دەستهەلاتا نوو یا سوورییێ بکەت.
پشتى ژناڤچوونا رژێما ئه‌سه‌دى، چه‌ند كچێن ره‌ڤانديێن ئێزدى ل باژێرێن سووريێ هاتنه رزگاركرن و ل گۆڕه‌ى زانيارييان هێشتا ب سه‌دان ره‌ڤاندى ب تايبه‌ت ل باژێرێ حه‌له‌بێ ماينه
.
ل رۆژا 3/8/2014ێ تیرۆرستێن داعش هێرشى سه‌ر قه‌زا شنگالێ كر و دئه‌نجامدا شه‌ش هه‌زار و 417 كه‌سێن ئێزدى ژ هه‌ردوو ڕه‌گه‌زان ژلایێ تیرۆرستان ڤه هاتنه گرتن و ره‌ڤاندن.
ب پشتەڤانیا حکومەتا هەرێما کوردستانێ هه‌تا نوكه پتر ژ سێ هه‌زار كه‌سان ژ هه‌ردوو ڕه‌گه‌زان هاتینه رزگاركرن و هێشتا چاره‌نڤیسێ پتر ژ دوو هه‌زار كه‌سێن ئێزدى ژهه‌ردوو ڕه‌گه‌زان يێ دیار نینە.