ناڤەندا نووچەیان – سەما
پرۆسەیا تۆمارکرنا زانیاریێن ئاواران بۆ دەرێخستنا کارتی نشتيمانی ل ناڤ کەمپان دەستپێکر، ئەندامه‌كا فراکسیۆنا پارتی ژى دبێژت: ڕۆژانە زانیاریێن نێزیکی 100 ئاوارە دێ ئێنه تۆماركرن.
ڤیان دەخیل، ئەنداما فراکسیۆنا پارتی دیموکراتی کوردستان ل پەرلەمانێ عيراقێ، د داخويانيه‌كا ڕۆژنامەڤانى دا ڕاگەهاند: ئيرۆ دووشەمبوويێ، 16-12-2024، پرۆسەیا تۆمارکرنا زانیاریێن ئاواران بۆ دەرێخستنا کارتی نشتيمانی، ل ناڤ کەمپان دەستپێکر.
ڤیان دەخیل، ئاماژە ب وێ چه‌ندێ دا، ل ده‌ستپێكێ ل کەمپا شاریا ل سنوورێ پارێزگه‌ها دهۆکێ دەست پێ کر و پاشى پرۆسە ل کەمپێن دی ژى دێ يا بەردەوام بت، گۆتژى:”ب هاريكارى ل گەڵ رێڤه‌به‌ريا ڕەگەزنامە و پاسپۆرتێن پارێزگه‌ها دهۆکێ، ڕۆژانە زانیاریێن نێزیکی 100 ئاوارەيان بۆ کارتی نشتيمانی دێ ئێنه تۆماركرن.
ده‌رباره‌ى چاوانيا ب رێڤه‌چوونا پرۆسێ، ئه‌نداما فراكسيۆنا پارتى گۆت:”ناڤ و ته‌ڤاهيا زانیاریێن ئاوارن ژلایێ تیمه‌كێ کو ژ نوونەرێن ژمارەیەکا دامودەزگه‌هان پێکهاتيە دئێنه تۆماركرن، پشتى دو ڕۆژان ژ تۆمارکرنا زانیاریان، دڤێت ئاواره بچنە رێڤه‌به‌ريا گشتی يا ڕەگەزنامە و پاسپۆرتێن دهۆکێ تاكو پەنجەمۆرێن وان بێنه تۆماركرن، 10 ڕۆژێن دى ، کارتی نشتيمانی دێ بۆ وان ده‌رێخين و ئه‌م دێ به‌ينه ناڤ كه‌مپان.”
ل چەند ساڵێن بۆرى دا ئاوارێن ئاكنجيێن کەمپێن سنوورێ پارێزگه‌ها دهۆکێ، دڤيا بۆ دەرێخستنا کارتی نشتيمانی، سەره‌دانا شنگالێ کربان.