ناڤه‌ندا نووچه‌یان – سه‌ما
ئيرۆ ڕۆژا ئێک شەمبوويێ22ى كانوونا ئێكێ 2024ێ، بابێ شێخ، شێخ عەلی شێخ ئەلیاس، دگەل شاندەکێ ئۆلی و کەسایەتیێن ئێزدی سەره‌دانا کەمپا مام رەشان کر ، ژبۆ ژ نێزيك هايداربوون ل سه‌ر رەوشا په‌نابه‌رێن ئێزدیێن سووریێ یێن ل کەمپێ دا دژین.
د چارچوڤێ سەره‌دانێ دا، بابێ شێخ چاڤپێکەفتن دگەل گەلەک مالباتێن ئێزدی کر و گۆهداری کێشە و ئاستەنگێن وان بوو د بارودۆخێ ئاوارەبوونێ دا و دوپاتى ل سەر گرنگیا ئێكرێزیا ئێزدیان و پێشکێشکرنا پشتەڤانى یا پێتڤی ژ بۆ دەربازبوون ژ ڤێ تەنگاڤیێ كر، هەروەسا داخواز کر دەزگەهێن ناڤخۆیی و نێڤدەولەتی هەڤکار بن ژ بۆ باشترکرنا رەوشا ئێزدیێن سوریێ یێن ل کەمپێ دژین و دابینکرنا خزمەتگوزاریێن سەرەکی بۆ وان.
د ئاخفتنا خۆ دا، بابا شێخی سوپاسیێن خۆ یێن گەرم ئاراستەی سەرۆک مەسعود بارزانی و حکومەتا هەرێما کوردستانێ کرن ژبۆ پشتەڤانیا بەردەوام یا کو پێشکێشی ئێزدیان دکەن ل هەر دەڤەرەکێ جیهانێ، و پەسنا رۆلێ وان کر د راوەستانا دگەل جڤاکا ئێزدی دا د دەمێن هەری دژوار دا.
هه‌روه‌سا بابا شێخ د ئاخفتنا خۆ دا دوپاتى ل سەر گرنگیدانا خۆ یا بەردەوام ب پەیوەندیێن دگەل هەموو ئەندامێن جڤاکا ئێزدی كر، ئاماژە کر کو ئەڤ سەره‌دانە بەشەکە ژ زنجیرا بزاڤێن بەردەوام ژبۆ بهێزکرنا پەیوەندیان د ناڤبەرا ئێزدیان دا ل دەڤەرێن جودا، و کێمکرنا ئازارێن وان یێن ژ ئەگەرێ قەیرانێن کو هاتینە سەرێ وان.
پاشان گه‌ريانه‌ك دناڤا كه‌مپێ دا كر و تێدا چاڤدێریا رەوشا ئاڤاهی و خزمەتگوزاریێن پێشکێشکری کر، و ته‌كه‌زى ل سەر پێتڤیا کارکرنا هەڤپشک ژ بۆ باشترکرنا بارودۆخێن ژیانێ یێن ئاکنجیێن کەمپێ و دابینکرنا ژیانەکا بڕومەت بۆ وان كر.