ناڤەندا نووچەیان – سەما
په‌رله‌مانتاره‌كێ ئێزدى داخوازێ ژ سەرۆك وەزیرێ عيراقێ محەمەد شیاع سودانى دكه‌ت، هێزێن هەڤپەیمانیا نێڤدەولەتى ل دەڤەرێن كێمینەیان و ل قەزايا شنگالێ بمینن.
مه‌حما خه‌ليل، ئه‌ندامێ ئه‌نجوومه‌نێ نوونه‌رێن عيراقێ دبه‌يانه‌كێ دا راگه‌هاند، ژبه‌ر رەوشا نەخۆش یا دەڤەرێ و ئالۆزیێن وێ، پێدڤى یە سەرۆك وەزیرێ عيراقێ هێزێن هەڤپەیمانیا نێڤدەولەتى ل دەڤەرێن مە بهێلت، ژ بەر شیانێن وان یێن هەوالگێری و ئاسمانى و چەكێن پێشكەفتى، و شیانا وان بۆ لێدانێن پێشوەخت ل دژى تیرۆرستان و هەڤكارێن وان.
ئه‌ندامێ ئه‌نجوومه‌نێ نوونه‌رێن عيراقێ دوپاتكر، خەلكێ شنگالێ ب هەموو پێكهاتە و نەتەوەیێن خۆڤە و دەڤەرێن دى یێن كێمینەیان، راستى كۆمكوژیێ هاتن ژلایێ تيرۆرستێن داعشێ ڤه و برینێن شنگالێ هێشتا كوور و خوین درێژن ژ كریارێن داعشێ یێن وەك كۆچبەركرن ، كوشتن، ره‌ڤاندن و گۆڕێن بكۆم.
مه‌حما خه‌ليل ب پێدڤى زانى، ژبۆ پاراستنا قوربانیان و نه‌دووبارەبوونا جينۆسايدا ل شنگالێ ل سالا 2014ێ روودايى، دڤێت هێزێن هەڤپەیمانیا نێڤدەولەتى لێ هەبن.
هه‌روه‌سا دوپاتكر، رێككەفتنێن ئەمنى یێن د ناڤبەرا عیراق و هەڤپەیمانیا نێڤدەولەتى دا، دەستكەفتەكە بۆ عیراقێ و دەڤەرێ و هەروەسا بۆ كێمینەیێن ئایینى، و هەبوونا ڤان هێزان دێ هاریكاریا سەقامگێریا شنگالێ كەت، چنكو سەقامگیریا شنگالێ يا پارێزگەها نەینەوا و هەموو عیراقێ یە.