ناڤەندا نووچەیان – سەما
رێڤەبەرێ کۆچ و کۆچبەران و بەرسڤدانا قەیرانان ل دهۆکێ راگەهاند، د ساڵا 2024ێ دا پتر ژ هه‌زار مالباتێن ئاوارە ژ کەمپێن دهۆکێ ڤەگەریانە وارێن خۆ و پرۆسە ژی يا بەردەوامە.
حکومەتا عیراقێ 31ى تیرمەها 2024ێ دیار کربوو بۆ دائێخستنا کەمپان ل هەرێما کوردستانێ، لێ دائێخستنا کەمپان ل سنوورێ هەردو پارێزگەهێن هەولێر و دهۆکێ هاتیە ڕاگرتن.
شه‌مبوويێ 4ى كانوونا ئێكێ 2025ێ، پیر دەیان پیر جەعفەر، رێڤەبەرێ کۆچ و کۆچبەران و بەرسڤدانا قەیرانێن دهۆکێ بۆ سه‌ما راگەهاند: ڕاگرتنا بڕیارا دائێخستنا کەمپان يا بەردەوامە، نوكه هەردو حکومەتێن هەولێر و بەغدا د دانوستاندنان دا نە بۆ دیتنا ڕێکەکێ بۆ ڤەگەریانا ئاوارەیان.
ده‌رباره‌ى داوى ئامارێن ڤەگەریانا ئاوارەیان ل ساڵا 2024ێ، پیردەیان جەعفەر ئاشکراکر: ” پتر ژ هه‌زار مالباتان ڤەگەریاينە وارێن خۆ، لێ پرانیا وان پۆشمان دبن و ڤەدگەرن کەمپان ڤه.”
ل گۆر گۆتنا پیر دەیان پیر جەعفەر، دو ساڵە هەر پێنج سێکتەرێن خزمەتگوزاری، ئاڤا ڤەخوارنێ، کۆمکرنا زبلان و پاقژکرن، پەروەردە، تەندرۆستی و کارەبا ل کەمپان دا حکومەتا هەرێما کوردستانێ بودجەيى بۆ وان دابین دکەت.
ل سنورێ پارێزگەها دهۆکێ و ئیدارا زاخۆ، 20 کەمپێن ئاوارە و پەنابەران هەنە.