ناڤهندا نووچهیان – سهما
د چوارچۆڤێ پاراستن و نیشاندانا كهلتوور و فلكلۆرێ دهولهمهندێ دهڤهرا شنگالێ، ههردوو هونهرمهندێن ناڤدار خهلهف پاچۆ و مهجدهل مهروان، مژوولی ئامادهكاریێن دووماهیێ یێن كلیپهكا نوو و جودانه ب ناڤێ “بهرچهم”. ئهڤ بهرههمه كو ب شێوازێ فلكلۆر هاتییه دارشتن، بزاڤهكه بۆ ڤهگێڕان و زۆمكرن ل سهر جوانییا كێم وێنه یا سروشتێ شنگالێ و چهمێن وێ یێن ناڤدار.
كلیپا “بهرچهم” ژ ناڤێ خۆ دیاره كو ل سهر چهم و ئاڤێن دهڤهرێ دئاخڤت، بۆ ئهڤێ مهبهستێ ژی، وێنهكرنا كلیپێ ل چهندین جهێن ستراتیژی و جوان هاتییه ئهنجامدان، ژ وانژی: دهڤهرا خنسێ ل سنورێ قهزا شێخان، كو ڕهنگڤهدانا چهمێ بارێ و چهمێ كهرسێ و چهمێ صۆلاغێ یه ل چیایێ شنگالێ.
ئهڤ بهرههمه ب ههڤكارییا چهندین لایهنێن پسپۆر دهێته ئهنجامدان دا كو ب جوانترین شێوه بگههیته بهردهستێ بینهران:
-
دهرهێنان و وێنهگری: ل ژێر چاڤدێری و كارا هونهرمهند میرۆز شێخ میرزۆ دهێته ئهنجامدان، ژ كۆمپانیا “بههدینان ڤیدیۆ”، كو ب كوالێتییهكا بلند كار ل سهر دیمهنێن فلكلۆری كرییه.
-
تۆماركرنا دهنگی: ل ستۆدیۆیا محمد زهكی هاتییه رێكۆرد كرن، كو گرنگییهكا مهزن ب رهسهناتییا ئاوازێ و پهیڤێن فلكلۆری هاتییه دان.
د دیدارهكا تایبهت دا بۆ كهنالێ سهما و پهیامنێرا كهنالی سوزان كهریم، ههردوو هونهرمهند (خهلهف پاچۆ و مهجدهل مهروان) دگهل دهرهێنهرێ كلیپێ ئاماژه ب وێ چهندێ دا كو شنگال نه تنێ چیا و مێژوویا خۆڕاگرییێ یه، بهلكو وهلاتهكێ زهنگیینه ب كهلتوور و فلكلۆر و دیمهنێن خودایی. وان دیار كر كو ئارمانجا وان ژ ئهڤێ كلیپێ ئهوه جوانییا شنگالێ ب ڕێكا هونهری نیشا جیهانێ بدهن و ئهو دیمهنێن سرۆشتی یێن كو ڕهنگه خهلك كێمتر دیتبن، د ناڤ كلیپێ دا بهرجهسته بكهن.