ناڤه‌ندا نووچه‌یان – سه‌ما
نەتەوەيێن ئێكگرتى، د راپۆرتا خۆ یا وەرزی دا راگەهاند، پتر ژ 511 هه‌زار کۆچبەر و پەنابەر ل پارێزگەهێن دهۆک و هەولێرێ ئاكنجينه، کو پرانیا وان ل دەرڤەی کەمپانە.
سێ شەمبوويێ، 11ى شوباتا 2025ێ، کۆمیسیۆنا کاروبارێن پەنابەران یا سەر ب نەتەوەيێن ئێكگرتى، د راپۆرتا خۆ دا ئاماژە ب وێ چەندێ دایە “هەتا مەها کانوونا ئێکێ یا سالا 2024ێ، پتر ژ 36 هه‌زار کۆچبەر کو پرانیا وان ئێزدینە، کەمپێن وان هەردوو پارێزگەهان چۆل کرینە. نوکە ژی 242 هه‌زار پەنابەر، کو پرانیا وان سوورینە و ل پارێزگەهێن دهۆک و هەولێرێ ئاكنجينه، ژ وان 70% زارۆک و ژنن.”
د راپۆرتێ دا باس ل وێ ژی هاتیە کرن “230 هه‌زار کۆچبەر ل پارێزگەها هەولێرێ ئاكنجينه؛ ژ وان، 215 هه‌زار کەس ل دەرڤەی کەمپان دژین، د دەمەکی دا تنێ 11 هه‌زار کۆچبەر ل 6 کەمپان ئاكنجينه، ژ وێ ژمارێ ژی هەتا مەها کانوونا دووێ یا 2024ێ، 6 هه‌زار و 600 کەسان کەمپه چۆل کرینە.”
ل گۆڕه‌ى راپۆرتێ “پتر ژ 281 هه‌زار ئاواره ل پارێزگەها دهۆکێ نە، کو 65% ژ وان ل دەرڤەی کەمپان دژین، د دەمەکی دا تنێ 35% ژ ئاواران کو ژمارا وان 98 هه‌زار کەسە، ل 14 کەمپان ئاكنجينه کو 90% ژ وان ئێزدینە.”
نەتەوەيێن ئێكگرتى ئاماژە ب وێ چەندێ ژی کریە “هەتا مەها کانوونا دووێ یا 2024ێ، 30 هه‌زار کۆچبەران دهۆک چۆل کریە و پرانیا کۆچبەران ل دەڤەرێن ئامێدیێ، شێخان، ئاکرێ، سێمێل و زاخۆ ل دهۆکێ ئاكنجينه.”