ناڤه‌ندا نووچه‌يان – سه‌ما
ئيرۆ 11ى كانوونا دووێ 2025ێ، ده‌سته‌يا بلندا بنگه‌هێ لالش يێ ره‌وشه‌نبيرى و كۆمه‌ڵايه‌تى ل دهۆكێ، ديداره‌ك ل دۆر” ژیوارێ ئێزدیان ل بن سیبەرا گوهۆرینێن هەرێمایەتی ونێڤدەولەتی دە” بۆ چه‌ند پەرلەمانتار و وه‌زير و مامۆستايێن زانكۆيێ رێكخست.
ديدار ب به‌رهه‌ڤبوونا کەسایەتیێن سیاسی، جڤاکی و رەوشەنبیران، ل هۆلا شێخ شامۆ ل بنگه‌هێ لالش ب ڕێڤه‌چوو.
ل ده‌ستپێكێ ئاماده‌بوويى خۆله‌كه‌كێ سه‌كنين وه‌ك رێزگرتن بۆ گيانێ جانگۆريێن كوردستانێ و سه‌روه‌رێ وان بارزانيێ نه‌مر و ئدريسێ جوانه‌مه‌رگ، لدووڤدا سه‌عيد جردۆ، سه‌رۆكێ بنگه‌هێ لالش په‌يڤه‌ك پێشكێشكر.
د ديدارێ دا، هه‌ر ئێك ژ مه‌حما خه‌ليل و ڤيان ده‌خيل، ئه‌ندامێن په‌رله‌مانێ عيراقێ، د.ممۆ عوسمان وه‌زيرێ عيراقێ يێ به‌رێ، شه‌هاب داغ سه‌رۆكێ شێوه‌رمه‌نديا ئێزديان ل ئه‌لمانيا، پ.د. موئه‌يه‌د به‌‌ره‌كات و پ.هـ.د سه‌عيد خودێدا مامۆستايێن زانكۆيێ به‌شداربوون و تێدا ب تێر و ته‌سه‌ڵى باس ل ره‌وشا ئێزديان ل عيراقێ و سووريێ كرن.
ل پێرا ده‌رگه‌هێ دانوستاندنێ هاته ڤه‌كرن و ئاماده‌بوويان چه‌ندين پرسيار ئاراسته كرن و ژلايێ به‌شدارێن ديدارێ ڤه هاتن به‌رسڤدان.
بۆ زانين ئه‌ڤ ديدار ژلايێ د. فارس كتى، به‌رپرسێ پشكا په‌يوه‌نديان ڤه دهاته ب رێڤه‌برن.
