ناڤەندا نووچەیان – سەما
رێڤهبهرێ كۆچ و كۆچبهران ل دهۆكێ ئاشكراكر، ل كهمپێن ئاوارهيێن شنگالێ كێماسى د ههموو سێكتهران دا ههنه، حكومهتا عێراقێ هاريكارى و پشتهڤانييا ئاوارهيێن شنگالێ ناكهت.
ڕۆژی پێنج شهمبوويێ 18ـی ئهيلوولا 2025، پیر دهیان جهعفهر، رێڤهبهرێ كۆچ و كۆچبهران ل دهۆكێ تایبهت، بۆ سهما گۆت: ل دەمێ نوکە دا گهلهك کێماسی د هەموو سێکتەران دا ل كهمپان ههنه و تا نوکە حکومەتا عێراقا فیدڕال چ هاریکاری و پالپشتیەک بۆ ئاواران نەکریە ، بتنێ د ڤێ سالێ هەموویێ دا ئێک پارسێلا ئاهێن خارنێ یا مەهەکێ دابەشکریە.
پیر دهیان ئاماژه ب وێ چهندێ دا، پشتهڤانييا ڕێکخراوان بۆ کەمپان كێمبوويه، ب تایبەت پشتی بڕیارا سەرۆکێ ئەمریکا کو کارتێکرنەکا زۆرا مەزن ل هەموو رێکخراوان کریە.
دووپاتکر، دڤێت گڤاشتن ل سەر حکومەتا فیدڕال بێنە کرن ژبۆ بجهئينانا ڕێکكەفتنا شنگالێ یا دناڤبهرا ههولێر و بهغدايێ دا هاتيه ئيمزاكرن، ژبهركو بتنێ ئەڤە ڕێکە چارەیە بۆ ڤەگەریانا ئاوارەیان ب ئێمناهی.
يازده ساڵ ل سهر جينۆسايدا ئێزديان ل سهر دهستێ ڕێكخراوا داعش يا تيرۆرستى دهربازبوون، هێشتا ب هزاران ئاوارهيێن شنگالێ ل كهمپاندا ل سنوورێ پارێزگهها دهۆكێ دڕهوشهكا پهريشان دا دژين.
ل گۆڕهى ئامارا ڕێڤهبهريا كۆچ و كۆچبهران ل دهۆكێ، نێزيكى 280هزار ئاوارهيێن شنگالێ ل كهمپاندا ئاكنجينه و ژبهرنهبوونا خزمهتگۆزاريان و ئێمناهيێ ل شنگالێ نكارن ڤهگهڕنه دهڤهرێن خۆ ڤه.