ناڤەندا نووچەیان – سەما
لدووڤ كارنامه‌يا په‌رله‌مانێ عيراقێ ل ڕۆژا دووشه‌مبوويێ 13-1-2025، دێ خواندنا ئێكێ بۆ پرۆژه ياسايا پێشنيازكرى يا كۆمكوژيا ئێزديان ئێته كرن.
ل ڕۆژا پێنج شه‌مبوويێ 9-1-2025ێ، فه‌رمانگه‌ها راگه‌هاندنا په‌رله‌مانێ عيراقێ كارنه‌مه‌يا روونشتنا په‌رله‌مانێ عيراقێ بۆ ڕۆژێن ئێك شه‌مبوو، دووشه‌مبوويێ به‌لاڤكرن و تێدا ئاماژێ ب وێ چه‌ندێ دكه‌ت، چه‌ندین بابه‌ت و یاسا و پرۆژه‌یاسا دێ ئێنه گه‌نگه‌شه‌كرن و خواندن و ده‌نگدان بۆ ئێته كرن.
هه‌روه‌سا فه‌رمانگه‌ها راگه‌هاندنا په‌رله‌مانێ عيراقێ راگه‌هانديه، ل روونشتنا رۆژا دووشه‌مبوويێ دا خواندنا ئێكێ بۆ پرۆژه‌یاسایا كۆمكوژیا ئێزدیان دێ ئێته كرن كو ژلایێ لیژنا مافێ مرۆڤى ڤه هاتیه ئاماده‌كرن.
هه‌تا نۆكه كۆمكوژيا ئێزديان ژلايێ حكومه‌تا عيراقێ ڤه وه‌كو جينۆسايد نه‌هاتيه ناساندن و ڤێ چه‌ندێ ئێزدى دلگران كرينه و بوويه ئه‌گه‌ر ل سه‌ر ئاستێ نێڤ ده‌وله‌تى ئه‌ڤ كه‌يسه نه‌ئێته لڤاندن.