ناڤه‌ندا نووچه‌یان – سه‌ما
بگۆتنا رێڤه‌به‌رێ كۆچ و كۆچبه‌ران و به‌رسڤدانا قه‌یرانان ل پارێزگه‌ها دهۆكێ بریارا نوو یا سه‌رۆكێ ئه‌مریكا دۆنالد ترامپ بۆ قوتكرنا هاریكاریێن دارايى بۆ هه‌موو رێكخراوێن ئه‌مریكی، دێ كارتێكرنه‌كا مه‌زن ل ئاوارێن ئێزدی كه‌ت.
شه‌مبوويێ 8ى شوباتا 2025ێ، پير ده‌يان جه‌عفه‌ر، رێڤه‌به‌رێ كۆچ و كۆچبه‌ران و به‌رسڤدانا قه‌یرانان ل پارێزگه‌ها دهۆكێ بۆ سه‌ما راگه‌هاند: ڕاگرتنا هاریكاریێن دارايى يێن رێكخراوێن ئه‌مريكى ژلايێ سه‌رۆكێ ئه‌مريكا ڤه، دێ كارتێكرنه‌كا مه‌زن ل نێزیك ل سه‌ر ژیانا ئاوارێن ئێزدی ل كه‌مپان كه‌ت.
باس ل وێ چه‌ندێ ژى كر، پرانیا خه‌لكێ شنگالێ هێشتا ئاواره‌نه و نكارن ڤه‌گه‌رنه سه‌ر جهــ و وارێن خۆ.
رێڤه‌به‌رێ كۆچ و كۆچبه‌ران، دبێژت:” پێدڤيه پێداچوونه‌ك د ڤێ بریارێ دا بێته كرن، داكو هاریكاری بۆ ڤان ئاوارێن هه‌ژار و لێقه‌ومايی دبه‌رده‌وام بن”.
ل سنوورێ پارێزگه‌ها دهۆكێ و ئيدارا سه‌ربه‌خۆ يا زاخۆ 16كه‌مپێن ئاواره‌يان هه‌نه و پتريا وان خه‌لكێ شنگالێ نه، كو زێده‌ترى 10سالانه دناڤا خيڤه‌تان دا ژيانا خۆ ده‌رباز دكه‌ن.