ناڤه‌ندا نووچه‌یان – سه‌ما
ئيرۆ ئينيێ 14ى شوباتا 2025ێ، ل باره‌گايێ بنگه‌هێ لالش ل دهۆكێ خه‌لاتێن به‌ريكانا لالش بسه‌ر سه‌ركه‌فتيان دا هاتنه دابه‌شكرن، د ناڤا واندا 15 به‌شداربوويان نمره‌يێن باش بده‌ستڤه‌ئينابوون.
ب به‌رهه‌ڤبوونا د. كاروان محه‌مه‌د سابیر، ژ نڤیسینگه‌ها به‌ڕێز (مه‌سرور بارزانی) و سه‌عيد جردۆ، سه‌رۆكێ بنگه‌هێ لالش ل دهۆكێ و د. سه‌عيد خودێدا، جێگرێ سه‌رۆكێ بنگه‌هى و ئه‌ندامێن ده‌سته‌يا بلندا بنگه‌هێ لالش، درێوره‌سمه‌كێ دا 15 سه‌ركه‌فتيێن به‌ريكانا لالش “پرسيار و خه‌لات” هاتنه خه‌لاتكرن.
ل هه‌فتيا بۆرى، بۆ گه‌شه‌پێدانا شیانێن وان، ده‌سته‌يا بلندا بنگەهێ لالش یێ ره‌شەنبیرى و كۆمه‌ڵايه‌تى و بنگه‌هێ لالش تايێ خانكێ، به‌ريكانه‌ك بۆ نێزيكى 500 قوتابى و لاوان ژ هه‌ردوو ڕه‌گه‌زان ل ناحیا خانكێ ئەنجامدا.
د ناڤا به‌شداربوويان دا 15كەسان ب گۆڕەى ڕێزبەندیێ، باشترین نمرە بده‌ستڤه‌ئينابوون، ئيرۆ د رێوره‌سمه‌كا ژ هه‌ژى دا هاتنە خەلاتكرن.
دڤێ به‌ريكانێ دا، پێنجى پرسیار ئاراسته‌ى به‌شداربوويان هاتنه كرن، ب چاڤدێريا تیمەكێ پسپۆر و مامۆستایێن زانكۆیێ، ب سه‌ركه‌فتيانه ب رێڤه‌چوو.
تێكرایێ پرسیاران، ب رەنگەكێ ئەكادیمى، ب رەچاڤكرنا تەمەن و شیانێن زانستى یێن بەشداران هاتبوونە دارشتن، بابەتێن (مێژوویى، ئۆلى، نەتەوەیى، نشتيمانى و پرسیارێن گشتى) ب خۆ ڤه گرتبوون.
پرۆژێ به‌ريكانا لالش دێ بەرفرەهـ بت و بریارە ل سەرجەم دەڤەرێن ئێزدیان بێتە بجهئينان و گەنج و قوتابیێن ئێزدى ژێ مفادار ببن.