ناڤه‌ندا نووچه‌یان – سه‌ما
د.ڤيان ده‌خيل، ئه‌نداما په‌رله‌مانێ عيراقێ و محه‌مه‌د ئه‌لحسان، هنارتيێ تايبه‌تێ ئه‌ميندارێ گشتييێ نه‌ته‌وه‌يێن ئێكگرتى و سه‌رۆكێ نوونه‌راتيا نه‌ته‌وه‌يێن ئێكگرتى بۆ هاريكاريكرنا عيراقێ “يونامى” كۆمبوون.
نڤيسينگه‌ها په‌رله‌مانتارا ئێزدى د.ڤيان ده‌خيل د ڕاگه‌هاندنه‌كێ دا به‌لاڤكرييه، دكۆمبوونا ل گه‌ڵ محه‌مه‌د ئه‌لحسان، هنارتيێ تايبه‌تێ ئه‌ميندارێ گشتييێ نه‌ته‌وه‌يێن ئێكگرتى ل عيراقێ و سه‌رۆكێ نوونه‌راتيا نه‌ته‌وه‌يێن ئێكگرتى بۆ هاريكاريكرنا عيراقێ “يونامى”، دانوستاندن ل سه‌ر چه‌ندين ته‌وه‌رێن گرنگ هاته كرن، ژوانژى كه‌يسا ئاواره‌يێن ئێزدى.
د ته‌وه‌ره‌كێ دى دا، گه‌نگه‌شه ل دۆر ره‌وشا ڕزگاربوويێن ئێزدى هاته كرن و ئاسته‌نگێن دبنه ڕێگر ل هه‌مبه‌رى ڤه‌گه‌ريانا ئاواره‌يان بۆ سه‌ر ده‌ڤه‌رێن بۆ وان يێن ڕه‌سه‌ن ل شنگال و ده‌شتا نه‌ينه‌وا.
ل گۆڕه‌ى نڤيسينگه‌هێ، په‌رله‌مانتارێ دوپاتى ل ڕێككه‌فتنا شنگالێ دناڤبه‌را هه‌ولێرێ و به‌غدا دا كر و گۆت: “هێشتا بجهئينانا ڕێككه‌فتنێ به‌رده‌وام ڕاستى ئاسته‌نگێن به‌رده‌وام دبت و پێدڤيه جڤاكێ نێڤده‌وله‌تى بێته ده‌نگ و پشته‌ڤانيێ ل بجهئينانا به‌ندێن وێ بكه‌ت و ڕه‌وشا ئاسايى ببت بۆ ڤه‌گه‌ڕيانا ئاواره‌يان. ”
ژلايێ خۆڤه، محه‌مه‌د ئه‌لحسان به‌رهه‌ڤيا خۆ نيشاندا بۆ كه‌يسا ئێزديان و دوپاتكر كو ئه‌ڤ كه‌يسه ژ ئه‌وله‌وياتێن سه‌ره‌كى يێن ئه‌ركێ وييه ل عيراقێ و نوونه‌راتيا يونامى ب هه‌ماهه‌نگى ل گه‌ڵ لايه‌نێن په‌يوه‌نديدار كار دكه‌ت بۆ نه‌هێلانا به‌ربه‌ستان ل هه‌مبه‌رى دووباره ڤه‌گه‌ڕيانا ژيانێ بۆ شنگالێ و ده‌ڤه‌رێن زه‌ره‌مه‌ندبووين.