ناڤه‌ندا نووچه‌یان – سه‌ما
رێڤەبەرێ کۆچ و کۆچبەرێن دهۆکێ راگەهاند، رۆژا ئێك شه‌مبوويێ دێ دەست ب رێڤه‌برن مامەله‌يێن کارتا نشتيمانی ل کەمپان ئێتە کرن.
ئاوارەیێن شنگالێ ل پارێزگەها دهۆکێ د 14 کەمپان و جهان دا ئاكنجينه و پشكه‌ك ژی ل دەرڤەی کەمپان ل سنوورێ پارێزگەهێ دژین.
پیردەیان جەعفەر، رێڤەبەرێ کۆچ و کۆچبەران و به‌رسڤدانا قه‌يرانان ل پارێزگه‌ها دهۆکێ بۆ سه‌ما گۆت: ب هەڤکاری دگەل رێڤەبەریا رەگەزنامە و بارێ شارستانی یا دهۆکێ و نڤيسينگه‌ها د. ڤيان ده‌خيل، ئه‌نداما په‌رله‌مانێ عيراقێ، ل ڕۆژا ئێك شه‌مبوويێ 16-2-2025، دێ ده‌ست ب ده‌رێخستن و رێڤه‌برنا مامەله‌يێن کارتا نشتيمانی ل هه‌موو کەمپان ل سنوورێ پارێزگه‌ها دهۆكێ ئێتە کرن، بۆ هندێ ئاواره د ده‌مه‌كێ زوودا كارتا خۆ وه‌ربگرن.
ژ ده‌رئه‌نجامێ هێرشا رێكخراوا داعش يا تيرۆرستى بۆ سه‌ر شنگالێ ل ته‌باخا 2014ێ، زێده‌ترى 300هه‌زار خه‌لكێ شنگالێ ده‌ربه‌ده‌ر و ئاواره‌بوون و هێشتا ب هه‌زاران ل ناڤا كه‌مپاندا ماينه و ژ ئه‌گه‌رێ به‌رقرارنه‌بوونا ده‌ڤه‌رێ و نه‌بوونا خزمه‌تگۆزاريانه ڤه‌نه‌گه‌رياينه ده‌ڤه‌رێن خۆ.