ستران گۆتن ئانکو دەربرینەک … لەوما ددرێژیا مێژوێ دا وھەتا ئیرۆ رۆژ ھەر مرۆڤ ئی پێتڤی دەربرینێ بویە ژ ھەست وفکر وھزرێن خۆ ، ئەڤ دەربرینە بگەلەک رێکان دئێتە دیارکرن بۆ کەسێ بەرامبەر ، ژوان رێکا گوڕانی گۆتنێ و ئاواز وئستران ودەنگێن خۆش تایبەت لدەمێن بەرێ ئەو دەمێن کۆچک ودیوان و مەحفل وشەھیانان ھەتا بێی بگەھیە گۆرانی وسترانێت دگەل یاریکێن زارۆکان دئێنە گۆتن ، لسەر دەمێ بەرێ چاوابوو گۆتنا ستران ومقاما وکیبوون بڤی کارێ ھەنێ ئێ خۆش رادبوون ، ھەلبەت ل ھەر وەختەکی وھەر دەمەکی دەنگ خۆش ودەنگ بێژێن خۆ ھەبوون ژ ئافرەتان و ژ زەلامان ، لەوما دێ لدەمێ شەھیان وداواتان وھەر خۆشیەک ھەبا رابانا ب گۆتنا گۆرانی وسترانا ب وان دەنگێن نازک وزەلال و بھێز وپر خۆش پێ جڤات ودیوان خۆشکربان ،
ژنمونەین وی سەردەمی لدەمێ بەربوو دچۆنە بووکێ ، ئەوو کەسێن ژ ماڵا زاڤای رادبن وبەرف مالا بووکێڤە دچن لرۆژا داوەتێ ب مەرەما ئینانا بوکێ بۆ مالا زاڤای دبێژنێ بەربوو یان بەربووک ، دگەل مست قوتان وھلھلاندنێ وگۆتنا مقام وسترانان ، ھەلبەت بەرێ ب پێیان دچۆنە بوکێ وھەسپەک جوان دخەملاند دابووکێ لسەر سوارکەن وھندەک جاران زرنا بێژ ودھۆڵ قوت دیسان دکرنا سەر دەوارا داکوو گەلەک ماندو نەبن ، بتریا وان گۆرانیان ئەوێن دھاتنە گۆتن ئێت گۆڤەندێ بوون وئپ بنەماڵا زاڤایڤە دگرێدایبوون ، بۆ نمونە دێ گۆتبانا ئەوو کچکا ئاڤ کێش ئانکو ناڤێ خوشکا زاڤای دئینا ئەوا بکارێ کێشانا ئاڤێ رادبوو ، یان دێ کربانا بەحسێ ئافرەتا نان پێژ ئەوا نانی پاندکەت ونانی دپێژت یان یا جلشۆ ئەوا جلک وبەران دشۆت ب مەتح و باشی وەک رێزگرتنەک بۆ کار و خەباتا وان ئێشارەت پێ دھاتە دان ، لدەمێ بووک ڕادکرن ژ مالا بابێ وێ گەلەک گۆڕانی پێ دھاتنە گۆتن ژوانە ( بوکێ دەلالێ رابە خۆ کارکە ) کوو گەلەک یە بناڤ و دەنگ بوو ، ھەڕدیسان گۆڕانیا مەبێرۆ ما ژوا بێرۆ و نەرینێ ھەی نارین وگەلەکین دی بکەیف وخۆشی دگۆتن ھەتا بووک ژمالبابا وێ دگەھاندە مالا وێ یا نوو ، قۆناغا دووێ دێ چۆبانە زاڤا ژ مالا جیناران ئینابا ب گۆرانیا ( کاکۆ زاڤایۆ نەچە سەربانی ) ژبەرکو ژاڤا دبرنە سەربانێ مالا جیناران دەمێ بووک دئینە مالا بابێ زاڤای ، و پاشی دێ بکەیف و خۆشی ئینابانە ناڤا مالێ .
ئستران گۆتن ل کۆچک ودیوانان : وەکی دئێتە خۆێاکرن دگەلەک ھەلکەفتاندا ژیانا بەرێ ژیانەک پر تەعب و زەحمەت بوو و ب شێوەکی راستوخۆ ب سرۆشتێ وئاخێ وتەرش وتەوال وگیانەوەرانڤە یە گرێدایبوو ، لەوما لدەمێ ھێڤاری و شەڤ بێریێ دبوونە دەمێن بێھنڤەدانێ و خەلک ھەموو ل کۆچک ودیوانان دجڤینین ولێک کۆمدبوون ، ستران بێژێن دەنگ خۆش وتەمبوورڤانێن چەلەنک دھاتن تەمبوور لێ ددان وقیردکرنە سترانێت داستان وشەرێن بەرێ و وی سەردەمی مەدحێن مێرخاس وچەلەنگێن خۆ وئاغایێن ئێلێن خۆدکرن ،
ما دیوان ژ دیوانا ستران بێژ وتەمبوور ڤانان خۆشتر ھەبوو لسەر وی دەمی لەوما دیوان نەدھاتە گرێدان ھەگەر دەنگ بێژەک و تەمبور ڤانەک لێ نەبا ، گەلەک جاران دەمێ ستران دھاتنە گۆتن دیوانێ پێکڤە ل دوو ستران پێژی ڤەدگێران ئانکو گەلەک جاران دبۆنە مقام وزەوق لێدان دگەل ھەڤوو و دوو ، ھەر دیسان ستران مینا قسەتا ھەموو جۆر ھەنە . دیسان سترانێت عەشق و ئەڤینیێ جھێ خۆ دناڤا مەحفەلێن کۆچک ودێواناندا ھەبوون ، ستران گۆتن دگەل دەمێ کاری : لدەمێن بەرێ کار ئی زاڤبوو ژوانە دەمێ دروونا دەخلان مەلکێ پاڵان ھەبوو وپالا لسەر خەتاوی دەخل ددروتن ودگەلدا ستران بیژەکی دێ قیرکربا سترانەکە ب وەزن وقافیا دروونێ و پالا لدوو وی ڤەدگیران داکو زەوقێ وان خۆشبت وبتر بەرھەمێ کارێ وان دیاربت وبتر و خۆشتر دروونێ بکەن ، ھەر ھۆسا و بڤی رەنگی دگەل گێرانا دۆرا جێنجەرێ ستران دھاتنە گۆتن وگێرێ ودێرانێ وپیڤانا دەخلی وداگرتنێ وخالیکرنا دەخل ودانی وکایێ وقەسەلێ و گیرانا دەنگێ دستاری و قوتانا جۆھنی و ھەر کارەکی بەرێ ھاتبا ئانجامدان ، لسەر بیستانان لدەمێ ئاڤدانێ و چنینا بەرھەمێ وان بەردەوام بخۆ ستران دگۆتن لدرێژیا وەرزێن سالێدا ، شڤان وبلورا شڤانی چ جاران نائێتە ژبیرکرن لدەمێ جێراندنا پەزی ولدەمێ مەغلکرنێ وھاتنا بێریا بۆ ناڤا کەریێ پەزی ب مەرەما دۆتنێ ومێژاندنا کار وبەرخێن ساڤا ، دیرۆکا ستران گۆتنێ یە کەڤنە و یە درێژە ھەتا د شین و تازیاندا دیرۆکێن خەمگینیێ دئێنە گۆتن بەھرا بتر ژوان بدەنگێ ژنکێن بعەمر دناڤا مالا تازی دا دبێژن تایبەت ل شینا گەەنج ومێرخاس و کەسێن برومەت وقەدر وقیمەت دناڤا چڤاکیدا ، ژ ئالیەکی دیڤە دایک ھەردەم زارۆکێن خۆ لدەمێ ھژاندنا لاندکا وان ب گۆرانی ودەنگێ خۆش دبێژت تایبەت دەمێ بۆ زارۆکێ خۆ دگۆت لالی لالی دەلالێ منۆ لالی دا بنڤت ووووھتد .
