ناڤەندا نووچەیان – سەما
8ێ مەها ئادارێ ل سەرانسەری جیهانێ وەک رۆژا جیهانی یا ئافرەتان دئێتە بناڤکرن. د ڤێ رۆژا تایبەت دا، ئافرەتێن ئێزدی ب تایبەت رزگاربوویێن ژدەستێ داعش، رۆلێ سەرۆک وەزیران مەسرور بارزانی د پشتەڤانی و هاریکاریا وان دا بلند دنرخینن.
نۆفە غانم، ئێک ژ رزگاربوویێن دەستێ داعش، بۆ سەما دیار کر: “د رۆژا جیهانی یا ئافرەتان دا، ئەم ب فەر دزانین رۆلێ سەرۆکێ حکومەتا هەرێما کوردستانێ، مەسرور بارزانی، بلند بنرخینین. بەریا نەهـ سالان، ئەز دگەل هەشت ئەندامێن خێزانا خۆ ژ دەستێ داعش رزگار بووم. هەر ژ وی دەمی هەتا نهۆ، حکومەتا هەرێما کوردستانێ گاڤ ب گاڤ د خۆشی و نەخۆشیێن مە دا دگەل مە بوویە.”
وێ زێدەتر گۆت: “د ڤێ رۆژا پیرۆز دا، بۆ جارا شەشێ مە مینحەیا داریی یا سەرۆک وەزیران وەرگرت، یا کو ژ لایێ بنگەهێ لالش یێ رەوشەنبیری و کۆمەلایەتی ڤە ل سەر رزگاربوویێن ئێزدی ژ هەردو رەگەزان هەیڤانە دئێتە بەلاڤکرن. هەلبەت ژ لایێ ئابووری ڤە پشتەڤانیەکە گەلەک باشە. ئەز دبینم کو بەلاڤکرنا ڤێ مینحەیێ هەیڤانە گوهۆڕینەکا ئەرێنی د خێزانا مە دا چێدکەت. زێدەباری وێ چەندێ، ب پشتەڤانیا حکومەتێ، ڤەکرنا سەنتەرێن چارەسەریا دەروونی باشترین فاکتەرە کو رزگاربوویێن دەستێ داعش دووبارە خۆ دگەل ده‌وروبەر و ژینگەها خۆ بگونجینن و چارەسەریێ وەرگرن.”
ژ لایەکی دی، خەلەف دەروێش، ئێک ژ رزگاربوویێن دەستێ داعش، بۆ سەما گۆت: “ل رۆژا 3یێ هەیڤا تەباخێ یا سالا 2014ێ، ئەز دگەل 13 کەسێن ژ مالباتا خۆ ژ لایێ تیرۆرستێن داعش ڤە هاتبوومە رەڤاندن. پشتی چەندین سالان، ب رێکێن جودا جودا، دگەل نەهـ کەس و کارێن خۆ رزگار بووم. د نهۆ دا، ئەم هەموو مینحەیا هەیڤانە یا سەرۆک وەزیران مەسرور بارزانی وەردگرین. ئەڤ چەندە بوویە داهاتەکێ باش ژ بۆ مە.”
هەروەسا گۆت: “زێدەباری وێ چەندێ، دەرگەهێ هەموو دام و دەزگەهێن حکومەتا هەرێما کوردستانێ ل بەر مە ڤەکرینە ژبۆ ب رێڤەبرنا مامەلەیێن مە، خواست ژى کەس و کارێن وی یێن هێشتا دبێسەروشوونن، دووڤچوونا وان بێتە کرن و ئەو ژی بێنە رزگارکرن.
ل سه‌ر هه‌مان بابه‌ت، ئەسعەد رەشید، بەرپرسێ بەشێ کۆمەلایەتی ل دەستەیا بلندا بنگەهێ لالش ل دهۆکێ، بۆ سەما راگه‌هاند: “ب پشتەڤانیا نڤیسینگەها بەرێز مەسرور بارزانی، سەرۆکێ حکومەتا هەرێما کوردستانێ، کار ژ بۆ ڤەکرنا چەندین سەنتەرێن پێگەهاندن و چارەسەریا دەروونی ژ بۆ رزگاربوویێن ئێزدی ژ دەستێ داعش هاتیە کرن.”
وی زێدەکر: “ئەڤە پێنگاڤەکا گرنگە، ژبەرکو رزگاربوویان گەلەک ستەم و نەخۆشی و دەردەسەری ل سەر دەستێ تیرۆرستان دیتینە و بارێ وان یێ دەروونی تێکچوویە. دەرمانکرنا برینێن دەروونی یێن کویر کو ژ ئەنجامێ توندوتیژیێ چێبووینە و هاریکاریکرنا رزگاربوویان بۆ ڤەگەریانا ناڤ جڤاکی ب شێوەیەکى ساخلەم و کاریگەر دکەت. هەروەسا ئاڤاکرنا هێز و شیانێن رزگاربوویان كو بکارن دەست ب ژیانەکا نوو بکەن. ئەڤ سەنتەرە دێ هێزێ ددەتە رزگاربوویان کو ژیانا خۆ ژ نوو ئاڤا بکەن پشتی ئەو سەردەمێن سەخت یێن کو تێدا دەرباز بووین.”
ل رۆژا 3ى تەباخا سالا 2014ێ، ژ ئەنجامێ هێرشا تیرۆرستێن داعش بۆ سەر شنگالێ، 6417 کەسێن ئێزدی هاتنە رەڤاندن. پتریا وان ئافرەت بوون. هەتا نهۆ، چارەنڤیسێ زێدەتر ژ 2800 کەسان دیار نینە. ئەو کەسێن هاتینە رزگارکرن، ژ لایێ حکومەتا هەرێما کوردستانێ ڤە، ژ لایێ داریی و ساخلەمیێ ڤە پشتەڤانیا وان دئێتە کرن.