ناڤه‌ندا نووچه‌يان – سه‌ما
ئێڤارييا رۆژا دووشه‌مبوويێ 17-3-2025ێ، د رێوره‌سمه‌كا ژ هه‌ژى دا، رێڤەبەریا ره‌وشه‌نبيرى و هونه‌رى ل پارێزگەها دهۆکێ، ب هەڤکاریا رێڤەبەریا ره‌وشه‌نبيرى و هونەرى ل سێمێلێ، ئه‌ندامێ ده‌سته‌يا بلندا بنگه‌هێ لالش نڤيسكار و ڤه‌كۆله‌ر داود موراد خه‌تاری ب مه‌دالييا زێرى خەلاتکر، ژبه‌ر رۆلێ وی یێ دیار و مەزن د بەلگەکرنا جينۆسايدا ئێزدیان دا ل شنگالێ.
خەلاتکرن د ئاهەنگەکێ دا ل هۆلا رێڤەبەریێ ل سێمێلێ، ل ژێر چاڤدێريا د. عەلی تەتەر، پارێزگارێ دهۆکێ هاتە ئەنجامدان، کو ب ئامادەبوونا ژمارەکا کەسایەتیێن دیار و ژ وانژى ئەمیرعەلی، رێڤەبەرێ گشتی یێ ره‌وشه‌نبيرى و هونه‌رى ل دهۆکێ، و سەعید جردۆ، سەرۆکێ ده‌سته‌يا بلندا بنگه‌هێ لالش یێ ره‌وشه‌نبيرى و كۆمه‌ڵايه‌تى ل دهۆكێ، و ئیحسان ئامێدی، رێڤەبەرێ ناڤەندا خانی یا ره‌وشه‌نبيرى و راگەهاندنێ و کۆمەکا مەزن ژ رەوشەنبیرێن گرنگيپێده‌ر د ڤی واری دا ژ نڤیسکار و ئەدیب و ڤەکۆلەران و یێن دی.
ئەڤ خەلاتکرن نەریتەكێ سالانە یە ژلایێ رێڤەبەریا ره‌وشه‌نبيرى و هونه‌رى ل سێمێلێ، کو ئەڤ خەلات ژبۆ کەسایەتیەکێ دیار د وارێ ره‌وشه‌نبيرى و هونەرى دا تێتە دان، و هه‌لبژارتنا “داود موراد خه‌تاری” بۆ ڤێ سالێ هات ژ بۆ سۆزدانێن وی یێن بهادار و گرنگ د وارێ بەلگەکرن و نڤیسینێ دا، کو ڤەکۆلەرى نێزیکی (٥٢) بەرهەم ل سەر جينۆسايدا ئێزدیان ل سه‌ر ده‌ستێ داعشێ هەینە، زێدەباری بابەتێن دی یێن پەیوەندیدار ب ئێزدیان و دیرۆکێ ڤه.
هه‌روه‌سا دپه‌يڤه‌كێ دا، ڤەکۆلەر داود موراد خه‌تاری سوپاسى و پێزانينێن خۆ ژبۆ ڤى خەلاتى ده‌ربرين، ئاماژە دا گرنگیا بەلگەکرنا چيرۆكێن رزگاربوویێن جينۆسايدێ ژبۆ بدەستڤەئینانا دادپەروەريێ بۆ قوربانیان و خەباتکرن بۆ رێگرتن ژ دووبارەبوونا ئەوا ل گەل ئێزدیان د دیرۆکێ دا چێبووی، و تەکەز کر کو ل سه‌ر خەباتا خۆ د ڤی واری دا دێ بەردەوام بت.
ئاهەنگ ب خەلاتکرنا ڤەکۆلەری ب مەدالیا زێڕین ژبه‌ر كه‌د و خەباتا وی د بەلگەکرنا جينۆسايدێ دا ب شێوەیەکێ زانستی و ئەکادیمی ب داوی هات.
بۆ زانین کو ڤەکۆلەر بەرپرسێ بەشێ ڤەکۆلینايه ل ده‌سته‌يا بلندا بنگه‌هێ لالش یێ ره‌وشه‌نبيرى و كۆمه‌ڵايه‌تى و بەرێ ژی د گەلەک هه‌لكه‌فتان دا هاتیە خەلاتکرن، ژبه‌ر رۆلێ وی د وارێ نڤیسین و بەلگەکرنێ دا و گرنگیدانا وی ب پرسێن جينۆسايدێ.