سەما تیڤی

په‌رده‌ ل سه‌ر پانۆراما جينۆسايدا ئێزديان ل بنگەهێ لالش هاتە لادان

ناڤه‌ندا نووچه‌يان – سه‌ما
سپێده‌هيا ئيرۆ سێ شه‌مبوويێ 18-3-2025ێ، ل باره‌گايێ بنگه‌هێ لالش ل دهۆكێ، درێوره‌سمه‌كێ دا په‌رده‌ ل سه‌ر پانوراما جينۆسايدا ئێزديان هاته‌ لادان، كو ده‌ر‌برينێ ژ ديمه‌نێن جينۆسايدێ دكه‌ت.

ب به‌رهه‌ڤبوونا د.كاروان محه‌مه‌د سابير، ژ نڤيسينگه‌ها به‌رێز( مه‌سرور بارزانى) سه‌رۆكێ حكومه‌تا هه‌رێما كوردستانێ و سه‌رۆك و ئه‌ندامێن ده‌سته‌يا بلند و هه‌ژماره‌كا به‌رپرسێن حكومى و حزبى و داى شه‌مێ نوونه‌را قوربانيان و رزگاربوويان، په‌رده‌ ل سه‌ر پانوراما جينۆسايدا ئێزديان هاته‌ لادان.

درێوره‌سمان دا، جه‌عفه‌ر سمۆ، ئه‌ندامێ ده‌سته‌يا بلندا بنگه‌هێ لالش دپه‌يڤه‌كێ دا بخێرهاتنا ئاماده‌بوويان كر و دياركر، كو تابلۆيه‌كا پانورامى ژلايێ شێوه‌كار ئارام ناسر خه‌لكێ هه‌ولێرێ ڤه‌ هاتيه‌ دروستكرن و ئه‌ڤه‌ دچارچووڤێ بزاڤ و چالاكيێن به‌رده‌وام يێن بنگه‌هێ لالش دايه‌ ب پشته‌ڤانيا نڤيسنگه‌ها سه‌رۆكێ حكومه‌تێ، بۆ هندێ هه‌ر كه‌سه‌كێ ل ده‌مێ سه‌ره‌دانا بنگه‌هێ لالش دكه‌ت هه‌ست ب ئێش و ئازارێن ئێزديان بكه‌ت، ژبه‌ر جينۆسايدا بسه‌رێ ئه‌واندا هاتى ل سه‌ر ده‌ستێ تيرۆرستێن داعشێ.

لدووڤدا سه‌عيد جردۆ، سه‌رۆكێ بنگه‌هێ لالش په‌يڤه‌ك پێشكێشكر و گۆت: ئيرۆ جهێ شانازيێ يه‌ بۆ مه‌ وه‌كو بنگه‌هێ لالش ب هه‌ڤكارى ل نڤيسينگه‌ها سه‌رۆكێ حكومه‌تا هه‌رێما كوردستانێ كو كاره‌كێ هونه‌رى بێته‌ دروستكرن ئه‌و ژى پانوراما شنگال بوويه‌ كو ده‌ربرينێ ژ جينۆسايدا ئێزديان بكه‌ت و ئه‌و ئاخ و به‌رێن پيرۆز يێن ڕێكا لێقه‌وميايى يێن جينۆسايدێ تێدا ده‌ربازبووين هاتينه‌ دانان داكو جۆره‌ پيرۆزيه‌كێ بده‌ته‌ ڤى كارى.

ژلايێ خۆڤه‌، ئارام ناسر، شێوه‌كارێ تابلۆيێ دياركر، ئه‌ڤ كاره‌ د گه‌له‌ك قۆناغان ڕا ده‌ربازبوو، ئێك ل هه‌ولێرێ وه‌كو تابلۆ و يا دووێ ل بنگه‌هێ لالش و نێزیكی هه‌یڤه‌كێ مژوولی ئه‌نجامدانا ڤی كاری بووین، درێژاهیا تابلۆيێ شه‌ش مه‌تره‌ پێوانه‌یی و تابلۆ دوو مه‌تران بیست سانیتمه‌تران یا بلنده‌ و بلنداهیا گشتی نێزیكی چار مه‌ترایه‌ و رۆناهیا كا‌هره‌بی ژی تێدا هاتیه‌ بكارئینان، ناڤه‌رۆكا ڤی كاری ده‌ربرینێ ژ ئاواره‌بوونا خه‌لكێ شنگالێ ل سالا 2014ێ ل شنگالێ دكه‌ت، هیڤیدارم ئه‌ڤ كارێن هونه‌ری ل جهێن دیتر یێن كوردستانێ و جیهانێ بێنه‌ ئه‌نجام دان، داكو ب جیهانێ بێژین ئه‌ڤه‌ هه‌موو ئه‌و زولم و سته‌ما د دیرۆكێ دا ب سه‌رێ مه ملله‌تێ مو كوردا هاتى.

پاشان په‌رده‌ ژلايێ داى شه‌مێ وه‌كو نوونه‌را قوربانى و رزگاربوويان و ئاماده‌بوويان ل سه‌ر پانوراما شنگال هاته‌ لادان.

هه‌ر ژ ده‌ستپێكا جينۆسايدا ئێزديان ل سه‌ر ده‌ستێ رێكخراوا داعش يا تيرۆرستى، بنگه‌هێ لالش يێ ره‌وشه‌نبيرى و كۆمه‌ڵايه‌تى ل دهۆكێ ده‌ست ب ديكيۆمێنتكرنا جينۆسايدێ و ڤه‌حواندنا ئاواره‌يان و دانه‌نياسينا كه‌يسى ل سه‌ر ئاستێ ناڤخۆ و نێڤ ده‌وله‌تى كر و تا نوكه‌ به‌رده‌وامه‌.

><