ناڤه‌ندا نووچه‌يان – سه‌ما
سه‌رۆک وه‌زیرێ عیراقێ محه‌مه‌د شیاع سودانى، تاوانا ترسناک یا کو رژێما دیکتاتۆرى به‌رى ٣٧ سالان د ئه‌نفالێدا ئه‌نجام داى، بیر ئینایه‌ڤه، و دووپات کر کو گه‌لێ عیراقێ “ب ئێكگرتى به‌ره‌ف ئاڤاکرن و ئاشتیێ دچت”.
سودانى د نڤیسینه‌کا خۆ ل سه‌ر تۆرا “ئێکس” دا به‌لاڤكرييه وگۆت: “ترسناکیا وێ تاوانێ نه ته‌نها رێرێڤه‌برنا رژێما به‌رێ ئاشکرا کر، به‌لکو هه‌روه‌سا ھه‌ولێن وێ یێن بێ ھیڤى بۆ پارچه‌کرنا یه‌کگرتیا گه‌لێ عیراقێ و لاوازکرنا ھێزێن وى یێن نیشتیمانى دا ئاشکرا کر، لێ ئیراده‌یا عیراقیان ب ھێزتر بوو، ئيرۆ گیانێ برایه‌تى و پێکڤه‌ژیانێ ل سه‌ر ته‌مامى توڤێن نه‌فره‌تێ یێن کو به‌عسا سه‌دامى چاندیبوون سه‌رکه‌فتن ب ده‌ستڤه‌ئینايه.”
سودانى زێده‌کر: “ده‌مێ زۆردارى بۆ زبلدانکا دیرۆکێ چوز، و عیراقى ئيرۆ، ب ھه‌موو جوداھیێن خۆڤه، پێکڤه د ڕێکا ئاڤاکرن و گه‌شه‌کرنێ دا به‌رده‌وام دبن، ژ بۆ عیراقه‌کا یه‌کگرتى، ئه‌منبه‌خش و سه‌قامگیر.”
د ھه‌شتێن سه‌دسالێن بۆرى دا، ڕژێما به‌عسى ب ھزاران وه‌لاتیێن بێ گونه‌هـ ژ ده‌ڤه‌رێن جودا یێن کوردستانێ راکێشان و ئه‌و ل بیابانێن ناڤه‌راست و باشوورێ عیراقێ ھاتنه نه‌فیکرن و ب ساخى ھاتنه ڤه‌شارتن، و گه‌له‌ک ژ وان ھێژ د ناڤ وندابوویێن دا نه و چاره‌نڤیسێ وان نه‌دیاره.
د سالا ١٩٨٨ دا، رژێما به‌عسى بزاڤێن له‌شکه‌رى ئه‌نجامدان کو ناڤێ “ئه‌نفال” لێ کر، تێدا ب ھه‌زاران گوندێن کوردان ل هه‌رێما کوردستانێ کربوونه ئارمانج، و ئه‌نجامێ وێ کاولکرنا ب ھه‌زاران گوندان و گرتن و وندابوونا زێده‌تر ژ ١٨٢ ھه‌زار وه‌لاتیان بوو. ل ٢١ێ شوباتا بۆرى، ته‌رمێ ١٧٢ کوردێن قوربانیێن ئه‌نفالێ ھاتنه ڤه‌گه‌راندن.