ناڤه‌ندا نووچه‌يان – سه‌ما
كۆميسيۆنا بلند يا سەربەخۆيا هەلبژارتنان يا عيراقێ رادگه‌هينت؛ نووكرنا تۆمارا دەنگدەران ل هه‌موو پارێزگەهان بەردەوامە، ئاماژە ب وێ چەندێ دا، هەتا نۆكە نێزيكى ئێك مليۆن تۆمارێن دەنگدەران هاتينە تۆماركرن.
عیماد جەمیل، سەرۆكێ تیمێ راگەهاندنێ يێ كۆمیسیۆنێ د دانوستاندنەكێ دا بۆ ئاژانسا نووچه‌يێن عیراقێ راگەهاندیيە: نۆكە پرۆسەيا نووكرنا تۆمارا دەنگدەران ل نێزيكى 1079 ناڤەندێن تۆماركرنێ ل سەرانسەرى دەڤەرا جوگرافى يا هەلبژارتنان دئێتە ب رێڤەبرن، كو ژ 24 يان 25ێ هەيڤا بۆرى دەست ب كاركرنێ كرییە.
هەروەسا دياركر، مەبەست ژ درێژكرنا ماوەيێ نووكرنێ ئەوە كو دەرفەت ب فەرمانبەران و لايەنێن پەيوەنديدار يێن كەرتێ تايبەت بێتە دان بۆ نووكرنا داتايێن وان، ب تايبەتى ژبەركو بدەستڤەئینانا كارتا بايومەترى پێدڤييە بو بەشداريكرنێ دهەلبژارتنێن داهاتى دا.