ناڤه‌ندا نووچه‌يان – سه‌ما
برياره ل داويا ڤێ مه‌هێ کۆنفرانسێ نێڤدەولەتی یێ تایبەت ب ئێزدیان ل زانكۆيا دهۆكێ ب ڕێڤه‌بچت.
سه‌عيد جردۆ، سه‌رۆكێ بنگه‌هێ لالش يێ ره‌وشه‌نبيرى و كۆمه‌ڵايه‌تى ل دهۆكێ بۆ سه‌ما گۆت: ب پشته‌ڤانى و چاڤدێريا سه‌رۆكێ حكومه‌تا هه‌رێما كوردستانێ رێزدار مه‌سرور بارزانى، هه‌موو به‌رهه‌ڤيێن ئه‌نجامدانا مه‌زنترين كۆنفرانسێ ئێزديان لژێر ناڤ و نيشانێ (ئێزدى: ئايين، كه‌لتوور- مێژوو و جوگرافيا) به‌رف ته‌مامبوونێ ڤه دچن.
سه‌رۆكێ بنگه‌هێ لالش ئاماژه ب وێ چه‌ندێ دا، بنگەهێ لالش ب هەڤکاری ل گه‌ل كوليژا زانستێن مرۆڤايه‌تى ل زانکۆیا دهۆکێ، بەرهەڤیێن باش بۆ ئه‌نجامدانا كۆنفرانسى كرينه، كو برياره ل رۆژێن 29-30/4/2025ل هۆلا كۆنفرانسان ل زانكۆيا دهۆكێ ب رێڤه‌بچت.
ده‌رباره‌ى ناڤه‌ڕۆكا كۆنفرانسى سه‌عيد جردۆ گۆت: چەندین ڤەکۆلەر ونڤیسەرێن ناڤخۆیی وبیانی وێ تێدە بەشداربن ول دەمێ دو ڕۆژان وێ ب هزر وبۆچوون وزانیاریێن نوو رۆناهیێ ئێخنە سەر گەلەک ئالیێن گرێدایی ب دوهو ئیرۆ وپاشەرۆژا ئێزدیان.
چاڤێ هه‌موو ئێزديان ل سه‌ر كۆنفرانسى يه كو تێدا دێ به‌حس ل گه‌له‌ك بوارێن گرێدايى ب پێشه‌رۆژ و ره‌وشا ئێزديان ڤه ئێته كرن.
كۆنفرانسێن ئێزدييان گرنگييه‌كا مه‌زن هه‌يه ژ چه‌ند ئاليان ڤه. ئه‌ڤ كۆنفرانس ده‌رفه‌ته‌كێ دده‌ن كو خه‌لكێ ئێزدى ژ هه‌ر جهه‌كى بهێن پێكڤه و ل سه‌ر پرسێن گرنگ يێن جڤاكێ خۆ دانوستاندنان بكه‌ن.
كۆنفرانس ده‌رفه‌تا پاراستنا ناسناما ئێزدييان و چاندا وان دده‌ن. پشتى روودانێن تراژيك يێن سالێن داوييێ، نها ژ هه‌ر ده‌مه‌كێ گرنگتره كو ئێزدى پێكڤه بن بۆ پاراستنا كه‌له‌پوورێ خۆ و زمانێ خۆ.
هه‌روه‌سا كۆنفرانس دبنه پره‌ك دناڤبه‌را ئێزدييێن ناڤخۆيى و يێن دياسپۆرايێ دا. ئه‌ڤه يا گرنگه بۆ هێزكرنا په‌يوه‌ندييان و پاراستنا ئێكگرتنا جڤاكێ ئێزدى ل سه‌رانسه‌رى جيهانێ.
بۆ جيهانا ده‌رڤه، كۆنفرانس ده‌رفه‌تا نياسينا باشتر يا چاندا ئێزدى و زێده‌كرنا هشياريێ ل سه‌ر رووبه‌رووبوونێن وان ددن. ئه‌ڤه يا گرنگه بۆ راكێشانا پشته‌ڤانييا نێڤده‌وله‌تى و پاراستنا مافێن ڤێ جڤاكا كه‌ڤن.