ناڤه‌ندا نووچه‌یان – سه‌ما
جڤاتا ئێزديێن سووريێ رادگه‌هينت، هه‌تا نوكه پشتگیرییەکا سنووردار ژ هندەک لایەنێن سیاسی یێن نەتەوەیی وەرگرتییە بۆ ب فه‌رميكرنا ئۆلا ئێزديان ل وى وه‌لاتى.
دڤى ده‌رباره‌ى دا، كندال ره‌مۆ، ئه‌ندامێ جڤاتا ئێزديێن سووريێ بۆ سه‌ما راگه‌هاند: هه‌ر ژ ساڵا 2012، جڤاتا ئێزدیێن سووریێ خەباتێ دکە ژبۆ بدەستڤه‌ئينانا دانپێدانا دەستووری ب ئۆلا ئێزدی د دەستوورێ سووریێ دا. بەلێ ئەڤ داخوازە، مخابن، ب تنێ پشتگیرییەکا سنووردار ژ هندەک لایەنێن سیاسی یێن نەتەوەیی وەرگرتییە، دەمێ کو پشتگیرییەکا تەمام ژ ئه‌نجوومه‌نێ نەتەوەیی یێ کوردی و ژ ئیدارا خوه‌سەر ل باکوور و رۆژهەلاتێ سووریێ دا وەرگرتییە.
ئه‌ندامێ جڤاتا ئێزديێن سووريێ ئاشكراكر: پشتی کۆنفرانسێ ئێكگرتنا رێزێن کوردی، و وەرگرتنا فەرمی یا بەندا دانپێدانا دەستووری ب ئۆلا ئێزدیان د سووریا یا داهاتی دا، دەربڕینێن تایفی یێن نەیارکەر ژ هندەک کەسایەتیێن ئەرەبێن سووری ده‌ركه‌فتينه کو دبینن ئۆلا ئێزدی نە هێژایی ڤێ دانپێدانێ یە. و هندەکێن دی دیتن کو ژبه‌ر کێمییا هه‌ژمارا وان نابت داخوازا مافێن خۆ بکەن.
دبێژت: “پێدڤيه حكومه‌تا سووريێ مافێن ئێزديان مسۆگەر بکەت و دانپێدانێ ب هەبوون و ئۆلا وان بکەت”.
ناڤبرى دووپاتكر، گازيا خۆ دگه‌هيننه هه‌موو سووریان پشتگیرییا داخوازيێن ئێزدیان يێن ڕەوا بۆ دانپێدانێ ب ئۆل و هەبوونا وان ل سووریێ بکەن، و بەشداریێ د ڕاستڤه‌كرنا شاشيێن دیرۆکی یێن کو درهەقێ وان دا هاتینە کرن بکەن.
هه‌تا نوكه حكومه‌تێن لدووڤ ئێكێن سووريێ، دانپێدان ب ئۆلا ئێزديان د ده‌سوورێ وى وه‌لاتى دا نه‌كريه و ڤێ يه‌كێ ئێزدى دلگران كرينه. ب هيڤى نه دحكومه‌تا نوكه يا ئه‌حمه‌د ئه‌لشه‌رعى دا مافێن وان بده‌ستڤه‌بێن.