ناڤهندا نووچهیان – سهما
شێوهرمهندێ سەرۆکوەزیرێن عێراقێ بۆ کاروبارێن ئێزدييان ئاشکرا دکەت، عێراقێ پڕۆژە یاسایهكا نوو بۆ دادگەهکرنا تيرۆرستێن داعشێ ب تاوانا “جینۆسایدێ” ئامادە کریيه کو ل ڤان نێزیکان دێ ئێتە شاندن بۆ پەرلەمانی. تهكهزى ژى كر دکەتەڤە کو بوونا گرۆپێن چەکدارێن دەرڤەی یاسایێ ل شنگالێ، مەزنترین ڕێگرە ل هەمبەر زڤڕینا ئاوارەیان.
د. خەلەف شنگالی، شێوهرمهندێ سەرۆکوەزیرێن عێراقێ بۆ کاروبارێن ئێزدييان بۆ مالپهرێ کوردستان24 ڕاگەهاند “پێشتر چەکدارێن داعشێ ل دادگەهێن عێراقێ تنێ لدووڤ یاسایا دژەپ تیرۆرێ دهاتنە دادگەهکرن، بەلێ نهۆ پڕۆژە یاسایهكا تایبەت بناڤێ (قانون مكافحة الجرائم الدولية) هەموو قۆناغێن خۆ ل ئەمانەتا گشتی يا ئەنجوومەنێ وەزیران و جڤاتا دەولەتێ بڕینە و ل ڤان نێزیکان دێ ئێتە شاندن بۆ پەرلەمانێ عێراقێ.”
شێوهرمهندێ سەرۆکوەزیرێن عێراقێ ڕۆنکر، ل دووڤ ڤێ یاسایا نوو، چەکدارێن داعشێ ڕاستەوخۆ ب تاوانا “جینۆساید، تاوانێن شهڕى و تاوانێن دژی مرۆڤاتیيێ” دێ ئێنە دادگەهکرن. هەروەسا د ناڤ یاسایێ دا بنەمایێ دامەزراندنا سندۆقەکا تایبەت بۆ قەرەبووکرنا مادی و مەعنەوی يا ڕزگاربوویان و زیانڤێکەڤتيیێن دەستێ داعشێ جێگیر کریيە.
سەبارەت ڕهوشا ئەمنی و ئیداری یا دەڤەرێ، د. خەلەف شنگالی ئاماژە ب وێ چهندێ دا، سەرۆکوەزیرێن عێراقێ نەڤێت چوو گرۆپێن چەکدار يێن دەرڤەی یاسایێ ل شنگالێ بمینن و کارێ جددی ل سەر ڕێکخستنا ڕهوشا ئەمنی دئێتە کرن.
تهكهز كر “ههبوونا گرۆپێن چەکدارێن جودا و نەفەرمی ل دەڤەرێ، مەزنترین ڕێگرە ل هەمبەر جێبەجێکرنا تەمام يا ڕێککەڤتنا شنگالێ و زڤڕینا ئاوارەیان. جێبەجێکرنا ڕێککەڤتنێ پێدڤی ب ئیرادەیەكا هەڤپشک يا بەغدا، هەولێر و کۆمەلگەها نێڤدەولەتی هەیە بۆ هندێ کو خزمەتگۆزاری بێنە برن بۆ دەڤەرێ و ئاسایيش جێگیر ببت.”
د بەشەکێ دی یێ ئاخڤتنا خۆ دا، شنگالی پهسنا هەولێن هەرێما کوردستانێ کر د کەیسا ئێزدیاين دا و گۆت “حکومەتا هەرێما کوردستانێ جینۆسایدا ئێزدیيان ب جیهانێ داناسین، هەزاران ئاوارە ل باوەشا خۆ گرتن و هەموو هەولێن خۆ بۆ پاراستنا وان تەرخان کرن، داخوازیيێن مەسرور بارزانی، سەرۆکێ حکومەتا هەرێما کوردستانێ ژی بۆ هەڤکاریکرنا ئێزدیيان تەمام د جهێ خۆ دانە.”