ناڤەندا نووچەیان – سەما
کۆمبوونەکا بەفرەھ ب ئامادەبوونا ژمارەکا زۆر یا کەسایەتی و وەلاتیێن ئێزدی یێن قەزا شێخان هاتە ئەنجامدان، ب مەرەما گەنگەشەکرن ل سەر چەندین بابەتێن خزمەتگۆزاری و جڤاکی یێن گرنگ بۆ دەڤەرێ.
ب گۆڕەیی جڤاتا جڤاکی یا ئێسڤنێ بەلاڤ کرییە، د ئەنجامێ جڤینێ دا، ب هەڤدەنگی و بڕیارا ئامادەبوویان، بڕیار هاتە دان هۆلەکا تایبەت بۆ ژنان ب مەرەما ئەنجامدانا ڕێورەسمێن تازییان ل سەنتەرێ ئێسڤنێ(شێخان)بێتە ئاڤاکرن.
ژ پێخەمەت ب ڕێڤەچۆنا کاران ب باشترین شێوە، لیژنەیەکا تایبەت ژ ناڤ ئامادەبوویان هاتە دەستنیشانکرن کو ب هەماهنگی دگەل ئەندازیارێ سەرپەرشت دێ کار ل سەر دیزاین و ئاڤاکرنا ڤی پرۆژەی کەن.
دا کو ئەڤ پرۆژە ب زووترین دەم بکەفتە د خزمەتا گشتی دا، بانگەوازەک ئاراستەی هەموو خودان خێر و کەسێن دلۆڤان ل ناڤخۆ و دەرڤەی وەلاتی دئێتە کرن کو ب هاریکاریێن خۆ یێن دارایی پشکدار بن د ڤێ کارێ خێرخوازی دا.
هەروەسا جهێ کۆمکرنا هاریکارییان دێ بارەگەهێ جڤاتا جڤاکی ل شێخان بت.
مەرەم ژێ خزمەتکرنا جڤاکی و دابینکرنا جهەکێ گونجای بۆ ژنان د دەمێ ڕێورەسمان دا.