ناڤه‌ندا نووچه‌یان – سه‌ما
ب هه‌لكه‌فتا ده‌ربازبوونا 56 سالان ب سه‌ر دامه‌زراندنا پارێزگه‌هبوونێ دا، پارێزگارێ دهۆكێ په‌يامه‌ك به‌لاڤكر و ڕاگه‌هاند، دهۆك جهێ پێكڤه‌ژیانا هه‌موو ئۆل و نه‌ته‌وه‌یانه.
سێ شەمبوويێ 27ی گوڵانا 2025،د.عه‌لى ته‌ته‌ر، پارێزگارێ دهۆكێ د په‌يامه‌كێ دا پیرۆزباهى ئاراسته‌ى هه‌موو خه‌لكێ دهۆكێ كر، ب هه‌لكه‌فتا ده‌ربازبوونا 56 سالان ب سه‌ر دامه‌زراندنا پارێزگه‌ها دهۆكێ.
د.عه‌لى ته‌ته‌ر، پارێزگارێ دهۆكێ دیاركر، پارێزگه‌ها دهۆكێ جهێ پێكڤه‌ژیانا هه‌موو ئۆل و نه‌ته‌وه‌یانه، هه‌رده‌م ده‌رگه‌هێ وان بۆ خه‌لكێ لێقه‌ومایى یێ ڤه‌كرى بوویه، خه‌لكێ ڤێ پارێزگه‌هێ ب ڕه‌وشتێ بلندێ مرۆڤایه‌تى، پێگرى ب یاسایێ، گیانێ نيشتیمانى و نه‌ته‌وه‌یڤه یێ ناڤداره، خزمه‌تكرنا ڤێ پارێزگه‌هێ و خه‌لكێ وێ بۆ وان جهێ شانازیێیه.
پارێزگارێ دهۆكێ ڕاگه‌هاند ژى ” بۆ پێشئێخستن و پێشڤه‌برنا پارێزگه‌ها دهۆكێ ژ هه‌موو ڕوویه‌كی ڤه، پێدڤییه ئه‌م هه‌موو ده‌ست ده‌ینه ئێك، حكومه‌ت و گه‌ل، هه‌موو شیانێن خۆ بكاربیننن و پێكڤه وه‌لاتێ خۆ ب پارێزن و ئاڤه‌دانبكه‌ین.”
ل 27ی گوڵانا 1969 دهۆك بوویه پارێزگه‌هـ و چه‌ندین قۆناخێن گوهرین و پێشكه‌فتنێ دیتینه، دهۆك نوکە د ئاسته‌كێ دی یێ مەزنبوون و بەرفرەهبوونێ دایه.
پارێزگەها دهۆکێ ژلایێ ئاکنجییان ڤە پشتی سالا 2003ـێ گەشەیەکا بەرچاڤ ب خۆ ڤە دیتییە، ل سالا 1997ـێ سەرجەمێ ئاکنجییان 402 هه‌زار کەس بوون، پشتی سالا 2003ـێ بلندبوو و گەهشتە 616,600 هه‌زار کەسان و ل 2021ـێ گەهشتە 1.4 مليۆن کەسان.