ناڤه‌ندا نووچه‌يان – سه‌ما
به‌رده‌وامیدان ب گه‌هاندنا پرۆژه‌يێن خزمه‌تگۆزارى ل هه‌موو ده‌ڤه‌رێن پارێزگه‌ها دهۆكێ، ئيڕۆ 16-6-2025، هه‌ژماره‌كا پڕۆژه‌يێن خزمه‌تگۆزارى ب گوژمێ نێزیكى 2 ملیار دینارا ل ناوچه‌داریێن مسێریك وخانكێ سه‌رب ده‌ڤه‌رداریا سێمێلێ هاتنه ڤه‌كرن.
ب ئاماده‌بونا د.عه‌لى ته‌ته‌ر، پارێزگارێ دهۆكێ و خه‌لیل مه‌حمود، ده‌ڤه‌ردارێ سێمێلێ و ڕێڤه‌به‌رێن ناوچه‌داریێن مسێریك وخانكێ و چه‌ند به‌رپرسێن حكومى و حزبى و خه‌لكێ ده‌ڤه‌رێ، هه‌ژماره‌كا پڕۆژه‌يێن خزمه‌تگۆزارى ب گوژمێ نێزیكى 2 ملیار دینارا ل ناوچه‌داریێن مسێریك و خانكێ سه‌رب ده‌ڤه‌رداریا سێمێلێ هاتنه ڤه‌كرن.
ئه‌و پڕۆژێن هاتینه ڤه‌كرن هه‌ژماره‌كا جادا ل خانكێ و مسێریكێ ب درێژاهیا 5كم و هۆڵێن هه‌ڵكه‌فتا ل گوندێن گرێ گه‌ورێ و كه‌مونا و ویاریگه‌هه‌كا وه‌رزشى یا دایخستى ل خانكێ و چه‌ند پڕۆژێن دى ل سه‌ر بوودجا پارێزگه‌ها دهۆكێ هاتینه چێكرن.
پارێزگارێ دهۆكێ دیاركر، ئيڕۆ مه ب بهایێ نێزیكى 2 ملیار دینارا پڕۆژه ل هه‌ردوو ناوچه‌داریێن خانكێ و مسێریكێ ڤه‌كرن، ئه‌ڤ هه‌ردوو ناوچه‌داریه دمه‌زنن و پێدڤى ب خزمه‌تگۆزاریێن پتر هه‌یه و دێ به‌رده‌وام خزمه‌تا ڤان هه‌ردوو ناوچه‌داریا كه‌ین و ل ئاینده‌ى ژى پرۆژه به‌رده‌وام ل هه‌موو ده‌ڤه‌ردارى و ناوچه‌داریا ب یه‌كسانى دێ ئێنه گه‌هاندن.
ژلایێ خوڤه ده‌ڤه‌ردارێ سێمێلێ دیاركر، ل سێ چار سالێن بورى پتر ژ 378 پڕۆژه ب گوژمێ 266 ملیار دینارا هاتینه چێكرن و نوكه 51 پڕۆژه ل ژێر بجهئینانێ نه و مه بۆ ساڵا 2025 پێشنیاركریه 58 پڕۆژه ب گوژمێ 38 ملیار دینارا بهێنه دابینكرن.
